ന്യൂഡല്ഹി: കൊറോണ വൈറസ് വ്യാപനത്തെ തുടര്ന്ന് ലോക്ക് ഡൗണ് പ്രഖ്യാപിച്ചതോടെ നിര്ത്തിവെച്ച ആഭ്യന്തര വിമാന സര്വ്വീസുകള് മെയ് 25 മുതല് പുനരാരംഭിക്കുകയാണ്. കൊറോണ വ്യാപനത്തിനിടയിലും വിമാന സര്വ്വീസുകള് പുനരാരംഭിക്കുന്നത് ചിലരിലെങ്കിലും ആശങ്ക ഉയര്ത്തിയിട്ടുണ്ട്. എന്നാല് മറ്റ് യാത്രാ രീതികളെ അപേക്ഷിച്ച് വ്യോമ ഗതാതഗം ഏറ്റവും സുരക്ഷിതമായ മാര്ഗമാണെന്നാണ് വ്യോമയാന വിദഗ്ധര് പറയുന്നത്.
2003 ല് ആദ്യമായി സാര്സ് റിപ്പോര്ട്ട് ചെയ്ത ശേഷം വിമാന നിര്മ്മാതാക്കള് കാബിന് എയര് സംവിധാനം നവീകരിച്ചിരുന്നു. കാബിന് എപ്പോഴും വൃത്തിയായിരിക്കുന്നുവെന്ന് ഉറപ്പാക്കുന്നതിന് കാര്യക്ഷമമായ വായു സഞ്ചാരവും ശുദ്ധീകരണ സംവിധാനങ്ങളും ഉണ്ടെന്ന് സാങ്കേതിക വിദഗ്ധര് വ്യക്തമാക്കുന്നു.
ഒരു സാധാരണ ശീതീകരണ സംവിധാനത്തില് വായു സഞ്ചാരം വലത്ത് നിന്നും ഇടത്തോട്ടോ അല്ലെങ്കില് മുന്നില് നിന്നും പിന്നിലേക്കോ ആണെങ്കില് വിമാനത്തില് വായു പ്രവാഹം സെക്കന്റില് ഒരു മീറ്റര് എന്ന തോതില് താഴേക്കാണ്. ഇത് അപകട സാധ്യത കുറയ്ക്കുമെന്നാണ് വിമാന നിര്മ്മാതാക്കള് പറയുന്നത്. ഓരോ രണ്ട്- മൂന്ന് മിനിട്ട് കൂടുമ്പോഴും കാബിന് എയര് പൂര്ണമായും ശുദ്ധീകരിക്കുകയും പുതുക്കുകയും ചെയ്യുന്നുവെന്നും വിദഗ്ധര് അവകാശപ്പെടുന്നു.
കൊറോണ വൈറസ് ഏകദേശം 0.125 മൈക്രോണ് വ്യാസമുള്ളതാണ്. എച്ച് ഇ പി എ ഫില്ട്ടറുകള് പിടിച്ചെടുക്കുന്ന കണങ്ങളുടെ വലുപ്പ പരിധി 0.01 മൈക്രോണും അതിന് മുകളിലുമാണെന്നുമാണ് വിമാന നിര്മ്മാതാക്കളുടെ അവകാശവാദം.