പാലക്കാട് : കൊറോണ വൈറസ് വ്യാപനത്തിന്റെ പശ്ചാത്തലത്തില് ജില്ലയില് നിരോധനാജ്ഞ പ്രഖ്യാപിച്ചു. ഈ മാസം 30 വരെയാണ് നിരോധനാജ്ഞ പ്രഖ്യാപിച്ചിരിക്കുന്നത്. നിരോധനാജ്ഞ തിങ്കളാഴ്ച മുതല് നിലവില് വരും. ജില്ലയില് കൊറോണ വൈറസ് ബാധിതരുടെ എണ്ണം അനിയന്ത്രിതമായി വര്ധിച്ചു വരുന്ന സാഹചര്യത്തിലാണ് നിരോധനാജ്ഞ പ്രഖ്യാപിക്കാന് ജില്ലാ ഭരണകൂടം തീരുമാനിച്ചത്.
നിലവില് ജില്ലയില് ആശങ്കപ്പെടേണ്ട സാഹചര്യമില്ലെന്ന് ജില്ലാ കളക്ടര് ഡി ബാലമുരളി അറിയിച്ചു. വൈറസ് ബാധിതരുടെ എണ്ണം വര്ധിക്കുന്ന സാഹചര്യത്തില് ജനങ്ങള് സര്ക്കാര് നിര്ദ്ദേശങ്ങള് നിര്ബന്ധമായും പാലിക്കണം. നിലവിലെ സാഹചര്യത്തില് രോഗം വരാതെ സൂക്ഷിക്കുകയാണ് ചെയ്യേണ്ടത്. ഇതിനായി മാസ്ക് ധരിക്കുക, സാമൂഹിക അകലം പാലിക്കുക, അനാവശ്യ ബസ് യാത്രകള് ഒഴിവാക്കുക, പരമാവധി ഓണ്ലൈന് സംവിധാനങ്ങള് ഉപയോഗിച്ച് സാധനങ്ങള് വാങ്ങുക തുടങ്ങിയ കോവിഡ് നിയന്ത്രണങ്ങള് പാലിച്ച് പൊതുജനങ്ങള് സര്ക്കാര് നിര്ദേശങ്ങളോട് സഹകരിക്കണം.
പ്രത്യേകിച്ച് കുട്ടികളും പ്രായം കൂടിയവരും പരമാവധി പുറത്തിറങ്ങാതിരിക്കുക. വീടിനുള്ളിലും വീടിനു പുറത്തും പരമാവധി അകലം പാലിച്ചു കഴിഞ്ഞാല് ഈ ആപത്തില് നിന്നും പൂര്ണ്ണമായും മാറി നില്ക്കാന് സാധിക്കുമെന്നും സര്ക്കാര് ഊര്ജ്ജസ്വലമായി തന്നെ പ്രവര്ത്തിക്കുന്നുണ്ടെന്നും ജില്ലാ കളക്ടര് വ്യക്തമാക്കി.