ഏറ്റുമാനൂര്: കൊറോണ വ്യാപനം തടയാന് മാസ്ക് ധരിക്കുന്നത് നിര്ബന്ധമാക്കിയിരിക്കുകയാണ്. വിവിധ തരത്തിലുള്ള മാസ്കുകള് ഇപ്പോള് ലഭ്യമാകാറുണ്ട്. അത്തരത്തില് വേറിട്ട മാസ്ക് നിര്മ്മാണ ആശയവുമായി എത്തിയിരിക്കുകയാണ് ഏറ്റുമാനൂര് സ്വദേശിയായ ബിനേഷ് ജി പോള് എന്ന യുവാവ്. ബിനേഷിന്റെ ബീനാ സ്റ്റുഡിയോയില് എത്തി ഫോട്ടോയും 60 രൂപയും നല്കിയാല് 20 മിനിട്ടിനുള്ളില് വെറൈറ്റി മാസ്ക് റെഡിയാകും.
സ്വന്തം മുഖമോ സിനിമാ താരങ്ങളുടെ മുഖമോ കുട്ടികള്ക്കായി കാര്ട്ടൂണ് കഥാപാത്രങ്ങളുടെ മുഖമോ ഒക്കെ ഉള്ള മാസ്കുകളാണ് ഇവിടെ നിര്മ്മിക്കുന്നത്. മാസ്ക് ധരിക്കുമ്പോള് മറഞ്ഞു പോകുന്ന ഭാഗം തുണി മാസ്കില് സൂപ്പര് ഇംപോസ് ചെയ്താണ് ഇത്തരത്തിലുള്ള വെറൈറ്റി മാസ്ക് നിര്മ്മിക്കുന്നത്.
പത്ത് വര്ഷത്തിലേറെയായി ഡിജിറ്റല് ഫോട്ടോഗ്രാഫി മേഖലയില് പ്രവര്ത്തിക്കുന്നയാളാണ് ബിനീഷ്. ആയിരത്തിലധികം മാസ്കുകള് ബിനേഷ് ഇതിനോടകം നിര്മ്മിച്ചു നല്കിയിട്ടുണ്ട്. അയ്യായിരം മാസ്കുകള് നിര്മ്മിക്കാനുള്ള ഓര്ഡറും ബിനേഷിന് ലഭിച്ചിട്ടുണ്ട്. മാസ്കിന്റെ നിര്മ്മാണ രീതിയും വിവരങ്ങളും തിരക്കി നിരവധി പേര് സ്റ്റുഡിയോയിലേക്ക് വിളിക്കുന്നുണ്ടെന്നും ബിനേഷ് പറയുന്നു.
