മോസ്കോ: മുലപ്പാലിലുള്ള പ്രോട്ടീനുകള്ക്ക് കൊറോണ വൈറസിനെ ചെറുക്കാനുള്ള ശേഷി ഉണ്ടായേക്കുമെന്ന് റഷ്യന് ഗവേഷകര്. മുലപ്പാലിലുള്ള ചില പ്രോട്ടീനുകള് കുട്ടികളിലെ രോഗപ്രതിരോധ ശേഷി സംവിധാനത്തെ ശക്തിപ്പെടുത്തുന്നുവെന്നാണ് ഗവേഷകരുടെ പഠനത്തില് കണ്ടെത്തിയത്. നവജാത ശിശുക്കളില് മറ്റുള്ളവരെ അപേക്ഷിച്ച് രോഗബാധ കുറവാണെന്ന വിവരങ്ങളുടെ അടിസ്ഥാനത്തില് നടത്തിയ പഠനത്തിലാണ് ഗവേഷകര് ഇത്തരമൊരു നിഗമനത്തിലെത്തിയത്. ഈ വിഷയത്തില് ഗവേഷണം നടത്തി കൊറോണക്കെതിരെ മരുന്ന് വികസിപ്പിക്കാനൊരുങ്ങുകയാണ് ഗവേഷകര്.
റഷ്യന് അക്കാദമി ഓഫ് സയന്സിലെ ജീന് ബയോളജി വിഭാഗമാണ് ഗവേഷണങ്ങള് നടത്തുന്നത്. മുലപ്പാലിലെ ലാക്ടോഫെറിന് എന്ന പ്രോട്ടീനാണ് നവജാത ശിശുക്കളെ രോഗബാധ ഉണ്ടാകുന്നതില് നിന്നും സംരക്ഷിക്കുന്നത്. നവജാത ശിശുക്കളില് രോഗപ്രതിരോധ സംവിധാനം വികസിച്ചു കൊണ്ടിരിക്കുന്ന സമയത്ത് ഈ പ്രോട്ടീനാണ് വൈറസ് ബാധയില് നിന്നും ബാക്ടീരിയകളുടെ ആക്രമണങ്ങളില് നിന്നും കുഞ്ഞുങ്ങളെ സംരക്ഷിക്കുന്നത്. ലാക്ടോഫെറിന് പ്രതിരോധ സംവിധാനത്തെ ശക്തിപ്പെടുത്തുന്ന പ്രോട്ടീനാണ്. മുതിര്ന്നവരിലും ഈ പ്രോട്ടീന് പ്രതിരോധ ശേഷി വര്ധിപ്പിക്കുമെന്നാണ് ഗവേഷകര് പറയുന്നത്. പ്രോട്ടീനെ അടിസ്ഥാനമാക്കി മരുന്ന് വികസിപ്പിക്കാനാണ് ഗവേഷകരുടെ ലക്ഷ്യം.
മനുഷ്യരുടേതിന് സമാനമായി ആട്ടിന് പാലില് നിന്നും ജനിതക പരിഷ്ക്കരണം നടത്തിയ പ്രോട്ടീന് നേരത്തെ റഷ്യന് ഗവേഷകര് വികസിപ്പിച്ചിരുന്നു. നിയോലാക്ടോഫെറിന് എന്ന് ഗവേഷകര് ഇതിന് പേരും നല്കിയിരുന്നു. ബാക്ടീരിയ, ഫംഗസ് എന്നിവ പ്രതിരോധിക്കാനുള്ള കഴിവ് നിയോലാക്ടോഫെറിന് ഉണ്ട്. റോട്ടാവൈറസ്, ഹെപ്പറ്റൈറ്റിസ് സി, എച്ച്ഐവി തുടങ്ങിയ വൈറസുകളുടെ പ്രവര്ത്തനത്തെ തടയാനുള്ള കഴിവ് ഇതിനുണ്ടെന്ന് ലബോറട്ടറികളില് നടത്തിയ പരിശോധനയില് തെളിഞ്ഞിട്ടുണ്ട്.
ആധുനിക ആന്റിബയോട്ടിക്കുകളെ പ്രതിരോധിക്കുന്ന ബാക്ടീരികളായ സുപ്പര് ബഗ്ഗുകളെ പോലും പ്രതിരോധിക്കാന് ഇത് സഹായിക്കുമെന്നാണ് ഗവേഷകരുടെ പ്രതീക്ഷ. നിയോലാേക്ടാഫെറിന്റെ ഈ ശേഷി കൊറോണ വൈറസിനെതിരെ ഉപയോഗിക്കാമോയെന്ന ഗവേഷണത്തിലാണ് ഗവേഷകര്. കോശങ്ങള്ക്കുള്ളിലേക്ക് കടന്നു കയറി പ്രത്യുത്പാദനം നടത്താനുള്ള വൈറസിന്റെ ശ്രമങ്ങളെ ഈ പ്രോട്ടീന് തടയുമെന്നാണ് ഗവേഷകരുടെ നിഗമനം. ഇതിനെ മരുന്നാക്കി ഉപയോഗിക്കാനുള്ള പരിശ്രമത്തിലാണ് ഗവേഷക സംഘം. ഇതിനായി കൂടുതര് പരീക്ഷണങ്ങള് ആവശ്യമാണെന്ന് ഇവര് പറയുന്നു.
