ജമൈക്ക: കൊറോണ ഭീതിമൂലം ഇംഗ്ലണ്ടുമായുള്ള ക്രിക്കറ്റ് പരമ്പരയില് നിന്നും മൂന്ന് വെസ്റ്റിന്ഡീസ് താരങ്ങള് പിന്മാറി. അടുത്തമാസം ഇംഗ്ലണ്ടില് ആരംഭിക്കാനിരിക്കുന്ന പരമ്പരയില് നിന്നാണ് മുന്ന് താരങ്ങള് പിന്മാറുന്നതായി കരീബിയന് ക്രിക്കറ്റ് ബോര്ഡിനെ അറിയിച്ചത്. മികച്ച ബാറ്റ്സ്മാനായ ഷിംറോണ് ഹെറ്റ്മെയറ്, ഡാറെന് ബ്രാവോ, ഓള്റൗണ്ടര് കീമോ പോള് എന്നിവരാണ് യാത്രചെയ്യില്ലെന്ന തീരുമാനം അറിയിച്ചത്.
മൂന്ന് ടെസ്റ്റ് മത്സരങ്ങളടങ്ങിയ പരമ്പര ഇന്നാണ് യഥാര്ത്ഥത്തില് ആരംഭിക്കാനിരുന്നത്. കൊറോണ കാരണം ഇരുടീമുകളുടേയും സമ്മതപ്രകാരം പരമ്പര ജൂലൈ മാസം 8-ാം തീയതിയിലേക്ക് മാറ്റിയിരിക്കുകയാണ്. അടുത്തമാസവും കാണികളില്ലാതെ മത്സരം നടത്താനാണ് ഇംഗ്ലീഷ് ക്രിക്കറ്റ് ബോര്ഡ് തീരുമാനം. പരമ്പരക്കായി ഈ മാസം 9-ാം തീയതി വെസ്റ്റിന്ഡീസ് ടീം ഇംഗ്ലണ്ടിലെത്തും. തുടര്ന്ന് 14 ദിവസത്തെ ക്വാറന്റൈനിന് ശേഷമാണ് ഒരുമിച്ച് പരിശീലനത്തിനിറങ്ങുക.
കൊറോണ കാലത്തെ അന്താരാഷ്ട്ര ലോക്ഡൗണിന് ശേഷം ആദ്യമായി ഇംഗ്ലണ്ടില് നടക്കാനിരിക്കുന്ന ആദ്യ ടെസ്റ്റ് പരമ്പര ഏറെ ആകാംഷയോടെയാണ് ക്രിക്കറ്റ് ആരാധകര് കാത്തിരിക്കുന്നത്. ഇതിനിടെ ജൂലൈ 3 മുതല് ഓസ്ട്രേലിയ ഇംഗ്ലണ്ടില് ടി20യ്ക്കും ഏകദിനങ്ങള്ക്കുമായി എത്തിച്ചേരുന്നുണ്ട്. ആദ്യ ടെസ്റ്റ് മത്സരം ജൂലൈ 8ന് സതാംപ്ടണിലാണ് ആരംഭിക്കുക. തുടര്ന്ന് 16-ാം തീയതിയും 24-ാം തീയതിയും ഓള്ഡ് ട്രാഫോഡിലാണ് നടത്താനിരിക്കുന്നത്. 14 അംഗ ടീമിനൊപ്പം 11 റിസര്വ് കളിക്കാരും ഇരുടീമുകള്ക്കൊപ്പം എത്താന് ഐസിസി അനുമതി നല്കിയിട്ടുണ്ട്.