മുംബൈ: മഹാരാഷ്ട്രയിലെ കൊറോണ ബാധിതര്ക്കിടയില് പ്രവര്ത്തിക്കുന്ന ആരോഗ്യപ്രവര്ത്തകരോട് യാതൊരു സഹതാപവും സംസ്ഥാനസര്ക്കാറിനില്ലെന്ന് ആരോപണം. ഡോക്ടര്മാരുടെ സംഘടനയായ അസോസിയേഷന് ഓഫ് മെഡിക്കല് കണ്സള്ട്ടന്സാണ് രൂക്ഷ വിമര്ശനവുമായി എത്തിയത്. മഹാരാഷ്ട്രാ മുഖ്യമന്ത്രി ഉദ്ധവ് താക്കറേയ്ക്ക് നല്കിയ കത്തിലാണ് ആരോഗ്യപ്രവര്ത്തകരുടെ ദുരിതവും പ്രതിഷേധവും അറിയിച്ചത്.
കൊറോണ മഹാരാഷ്ട്രയില് എല്ലാ അതിരുകളും കടന്ന് വ്യാപിച്ചിരിക്കുകയാണ്. ആശുപത്രികള് രോഗികളാല് നിറഞ്ഞു. ഇവരെയെല്ലാം ചികിത്സിക്കുന്ന ഡോക്ടര്മാരും നഴ്സുമാരും മറ്റ് ആശുപത്രിജീവനക്കാരുമെല്ലാം കൊറോണ ബാധിച്ച് ചികിത്സയിലാണ്. ഇത്തരം സാഹചര്യത്തില് സംസ്ഥാന സര്ക്കാറിന്റെ യാതൊരു കാരുണ്യമോ സഹകരണമോ കിട്ടുന്നില്ലെന്നാണ് കത്തിലൂടെ പരാതിപ്പെട്ടത്.
മുന് നിരയിലുള്ള ആരോഗ്യപ്രവര്ത്തകര്ക്കും ഡോക്ടര്മാര്ക്കും ഉള്പ്പടെ രോഗം പടരുന്നുണ്ട്. ജോലിയിലുള്ള അധികഭാരം ആരോഗ്യപ്രവര്ത്തകര്ക്ക് ശാരീരിക ക്ഷമത കുറയാന് കാരണമാകുന്നുണ്ട്. പരിഹരിക്കാനുള്ള ന്യൂട്രീഷന് സംവിധാനങ്ങള് ഇതുവരെ ലഭ്യമായിട്ടില്ല. ഇത് ആരോഗ്യ രംഗത്തെ പോരാളികളുടെ ആത്മവിശ്വാസം തകര്ക്കുന്ന നടപടിയാണെന്നും കത്തില് സൂചിപ്പിക്കുന്നു.
മഹാരാഷ്ട്രയില് നിലവില് 80,229 രോഗികളാണുള്ളത്. ആകെ മരണം 2849 എന്നാണ് സംസ്ഥാന സര്ക്കാര് കണക്ക്. ഇതുവരെ 35,156 പേര് രോഗമുക്തി നേടിയിട്ടുണ്ട്.
