ന്യൂഡല്ഹി: ഇന്ത്യന് മുന് ബൗളര് സഹീര്ഖാനെ പ്രശംസിച്ച് മുന് ബാറ്റ്സ്മാന് വി.വി.എസ്. ലക്ഷ്മണ്. സഹീറിന്റെ മികച്ച പെരുമാറ്റമാണ് ആ താരത്തിന്റെ വിജയങ്ങള്ക്ക് പിന്നിലെന്നാണ് ലക്ഷ്മണിന്റെ അഭിപ്രായം. ലോകോത്തര പേസ് ബൗളറെന്ന നിലയില് സഹീറിന്റെ നേട്ടങ്ങള് ശ്രീരാംപൂരില് നിന്നും ലോകക്രിക്കറ്റിന്റെ തലപ്പത്തേയക്ക് എത്തിയതിന് പിന്നില് ആ താരത്തിന്റെ സ്വഭാവഗുണം ഒന്നുമാത്രമാണെന്നാണ് ലക്ഷണിന്റെ വിലയിരുത്തല്.
‘ വലിയ നേട്ടങ്ങള് സ്വപ്നംകാണാനും അത് നേടാനുള്ള നിശ്ചയദാര്ഢ്യവും സഹീറിനെ ശ്രീരാംപൂരില് നിന്നും തിളക്കമാര്ന്ന അന്താരാഷ്ട്ര കായികരംഗത്തേക്ക് ഉയര്ത്തി. അയാളുടെ സ്വഭാവത്തിന്റെ കരുത്താണ് അതിന് സഹായിച്ചത്. അന്താരാഷ്ട്ര ക്രിക്കറ്റില് നിന്നും വിരമിച്ചിട്ടും കൗണ്ടിയില് വോര്സെസ്റ്ററിന് വേണ്ടി കളിക്കാന് കാണിക്കുന്ന ആ മിതത്വം അയാള് തന്നെത്തനെ സ്വയം കണ്ടെത്തിയതിനാലാണ് ്’ ലക്ഷ്മണ് ട്വിറ്ററിലൂടെ പറഞ്ഞു.
ഇന്ത്യന് ക്രിക്കറ്റ് ലോകത്തിന് സമ്മാനിച്ച ഏറ്റവും അപകടകാരിയായ സ്വിംഗ് ബൗളറാണ് സഹീര് ഖാന്. പുതിയ പന്തെറിയുന്നവരില് ഒരു സമയത്ത് ലോകത്തെ ഏറ്റവും മികച്ച ബൗളറായി സഹീര് മാറി. ഇന്ത്യയുടെ ബൗളിംഗ് ത്രയങ്ങളായി ജുവഗല് ശ്രീനാഥ്, സഹീര്, ആശിശ് നെഹ്റ കൂട്ടുകെട്ട് 2003 ലോകകപ്പില് ഏതു ടീമിനും പേടിസ്വപ്നമായി മാറി. 2011ലെ ലോകകപ്പ് നേട്ടത്തില് സഹീര് അവിഭാജ്യ ഘടകമായിരുന്നു. ഇന്ത്യക്കായി 92 ടെസ്റ്റുകളും 200 ഏകദിനങ്ങളും 17 ടി20യും കളിച്ച സഹീര് ഖാന് 601 വിക്കറ്റുകള് നേടിയ ശേഷമാണ് വിരമിച്ചത്. 2016ല് മുഹമ്മദ് ഷമിയെന്ന മറ്റൊരു മികച്ച ബൗളറിനാണ് സഹീര് വഴി മാറിക്കൊടുത്തത്.
