ദുബായ്: ടി20 ലോകകപ്പിന്റെ തീരുമാനം ആയില്ല. ഐ.സി.സി യോഗത്തിലാണ് തീരുമാനം അടുത്തമാസം എടുക്കാമെന്ന ധാരണയായത്. ലോകരാജ്യങ്ങളിലെ കൊറോണ പരിതസ്ഥിതി ഒരു മാസം കൂടി നോക്കിയ ശേഷം തീരുമാനമെടുക്കുന്നതാണ് ഉചിതം എന്നാണ് ഭൂരിപക്ഷം അംഗങ്ങളും സമ്മതിച്ചതെന്ന് ഐ.സി.സി വാര്ത്താക്കുറിപ്പില് അറിയിച്ചു. അതേസമയം ക്രിക്കറ്റില് നിലവില് നടക്കാനിരിക്കുന്ന മത്സരങ്ങളുടെ പുതിയ നിയമങ്ങളും കൊറോണ പ്രതിരോധ നിര്ദ്ദേശങ്ങളും ഐ.സി.സി അംഗീകരിച്ചു.
ടെലികോണ്ഫറന്സിംഗിലൂടെയാണ് ശശാങ്ക് മനോഹറിന്റെ നേതൃത്വത്തിലുള്ള സമിതി തീരുമാനം എടുത്തത്. ടി20 ലോകകപ്പ് ഉടനം നടത്തിയാല് കാണികളെ കിട്ടാതായാല് വന് നഷ്ടത്തില് കലാശിക്കുമെന്നാണ് ക്രിക്കറ്റ് ഓസ്ട്രേലിയ മുന്നോട്ട് വച്ച വാദം.ഐ.സി.സി തീരുമാനം നീളുന്നത് ഐ.പി.എല്ലിന്റെ നടത്തിപ്പിനെ ബാധിക്കുമെന്ന പ്രശ്നമാണ് ബിസിസിഐയ്ക്കുള്ളത്. ഒക്ടോബര്-നവംബര് സമയത്ത് ടി20 നടന്നില്ലെങ്കില് ഐ.പി.എല് നടത്താമെന്ന ധാരണയാണ് ബി.സി.സി.ഐ അംഗങ്ങള്ക്കുള്ളത്. 4000 കോടി രൂപയാണ് ഐ.പി.എല് നടക്കാതിരുന്നാലുണ്ടാകാനിടയുള്ള നഷ്ടം.
