ബെല്‍ഗ്രേഡ്: ആദ്രിയ ടൂര്‍ ടെന്നീസ് വേദിയില്‍ ലോക ഒന്നാം നമ്പര്‍ താരം ജോക്കോവിച്ച് വിതുമ്പി. സേവനകാര്യങ്ങള്‍ക്കായി സംഘടിപ്പിച്ച ടൂര്‍ണ്ണമെന്റില്‍ നിന്നും മടങ്ങും മുന്നേ കാണികളോടാണ് തന്റെ ആദ്യകാലഘട്ടം ജോക്കോവിച്ച് ഓര്‍ത്തെടുത്തത്. ഞായറാഴ്ച നടന്ന ആദ്രിയ ടൂര്‍ രണ്ടാം പാദ മത്സരത്തില്‍ ജോക്കോവിച്ച് ജര്‍മ്മനിയുടെ അലക്‌സാണ്ടര്‍ സെരേവിനെ തോല്‍പ്പിച്ചിരുന്നു. രണ്ടാം മത്സരത്തില്‍ ഡോമിനിക് തീം 4-3, 2-4,4-2ന് സെര്‍ബിയയുടെ ഫിലിപ്പ് ക്രാജിനോവിച്ചിനെയാണ് തോല്‍പ്പിച്ചത്.
ടീം ഇനമായ മത്സരത്തിന് ശേഷം സംസാരിക്കുമ്പോഴാണ് ജോക്കോവിച്ചിന് ചെറുപ്രായത്തില്‍ കളിച്ച ടൂര്‍ണ്ണമെന്റും പരിശീലകരും ഒക്കെ ഓര്‍മ്മയില്‍ വന്നത്. തന്നെ വളര്‍ത്തിയ കളിക്കളത്തിനും അന്നും ഇന്നും അവിടെ തനിക്ക് തണലായി നിന്ന പരിശീലകര്‍ക്കും നന്ദിപറയുമ്പോഴാണ് ജോക്കോവിച്ച് വിതുമ്പിയത്. തുടക്കമിട്ട കളിക്കളത്തോടും കുട്ടിക്കാലത്തെ പരിശീലകരോടും കൂട്ടുകാരോടും എന്നും സ്‌നേഹം മാത്രമേ നല്‍കാനുള്ളു എന്നും ജോക്കോവിച്ച് പറഞ്ഞു.
ക്രാജിനോവിച്ച് സ്വന്തം നാട്ടുകാരനും ലോക ഒന്നാം നമ്പറുമായ ജോക്കോവിച്ചിനെ ശനിയാഴ്ച നടന്ന മത്സരത്തില്‍ തോല്‍പ്പിച്ചിരുന്നു. ഞായറാഴ്ച ജോക്കോവിച്ച് ജര്‍മ്മനിയുടെ അലക്‌സാണ്ടര്‍ സെരേവിനെ തോല്‍പ്പിച്ചെങ്കിലും റൗണ്ട് റോബിന്‍ പോരാട്ടമായതിനാല്‍ ഫൈനലിലേക്ക് സ്ഥാനം കിട്ടിയില്ല. 2-1ന് ക്രാജിനോവിച്ച് ജയിക്കുകയും 5-3ന് സെറ്റുകള്‍ നേടുകയും ചെയ്തതോടെയാണ് ജോക്കോവിച്ച് പുറത്തായത്.
