ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റഡിന് തകര്‍പ്പന്‍ ജയം. എതിരില്ലാത്ത മൂന്നു ഗോളുകള്‍ക്ക് ഷെഫില്‍ഡ് യൂണൈറ്റഡിനെയാണ് മാഞ്ചസ്റ്റര്‍ തോല്‍പ്പിച്ചത്. അന്തോണി മാര്‍ഷ്യലിന്റെ സ്വപ്‌നതുല്യ ഹാട്രിക്കാണ് കളി മാഞ്ചസ്റ്ററിന്റേതാക്കിയത്. ഏഴു വര്‍ഷത്തിന് ശേഷമാണ് ഒരു പ്രീമിയര്‍ ലീഗ് താരം ഹാട്രിക് നേടുന്നത്.
കളിയുടെ 7-ാം മിനിറ്റിലാണ് മാര്‍ഷ്യല്‍ ആദ്യഗോള്‍ നേടിയത്. ആദ്യപകുതി അവസാനിക്കും മുന്നേ 44-ാം മിനിറ്റില്‍ രണ്ടാം ഗോളും ഫ്രാന്‍സിന്റെ താരം സ്വന്തമാക്കി. തുടര്‍ച്ചയായി ആക്രമിച്ചു കളിച്ച യുണൈറ്റഡിനായി മൂന്നാം ഗോളും മാര്‍ഷ്യന്‍ സമ്മാനിച്ചു. 74-ാം മിനിറ്റിലാണ് ഹാട്രിക് ഗോള്‍ പിറന്നത്.
ശക്തരായ രണ്ട് അറ്റാക്കിംഗ് ഫോര്‍വേഡുകളായിരുന്ന ലൂക്കാകുവിനേയും അലെക്‌സിസ് സാഞ്ചെസിനേയും ഇന്റര്‍ മിലാന് വിട്ടുകൊടുക്കേണ്ടിവന്നതാണ് സീസണില്‍ മാഞ്ചസ്റ്ററിന് വിനയായത്. എന്നാല്‍ ജനുവരിയില്‍ ബ്രൂണോ ഫെര്‍ണാണ്ടസ് വന്നതോടെ മാഞ്ചസ്റ്റര്‍ വിജയപാതയിലേക്ക് കയറുകയായിരുന്നു. ഫെര്‍ണാണ്ടസുമായി ചേര്‍ന്ന് സീസണിലെ ഏഴ് കളികളിലായി മാര്‍ഷ്യന്‍ ആറു ഗോളുകള്‍ ഇതുവരെ നേടിക്കഴിഞ്ഞു. ഇരുവരും എതിരാളി കളുടെ പോസ്റ്റിന് മുന്നില്‍ ശക്തമായ ആക്രമണം നടത്തുന്നവരാണെന്നതാണ് മാഞ്ചസ്റ്ററിനെ അപകടകാരിയാക്കുന്നത്.
മാര്‍ഷ്യലിന് മുമ്പ് റോബിന്‍ വാന്‍ പേഴ്‌സിയാണ് പ്രീമിയര്‍ ലീഗില്‍ ഹാട്രിക് നേടിയ താരം. ജയത്തോടെ മാഞ്ചസ്റ്റര്‍ ചെല്‍സിക്ക് പുറകില്‍ രണ്ടു പോയിന്റുമാത്രം വ്യത്യാസത്തില്‍ അഞ്ചാം സ്ഥാനത്തെത്തി. ഇന്ന് മാഞ്ചസ്റ്റര്‍ സിറ്റിക്കെതിരെ ചെല്‍സി കളത്തിലിറങ്ങുകയാണ്.
