ലണ്ടന്‍: ഇംഗ്ലണ്ട് ക്രിക്കറ്റ് ടീമിനെ കൊറോണക്കാല പരമ്പരയില്‍ ബെന്‍ സ്റ്റോക്സ് നയിക്കും. വെസ്റ്റിന്‍ഡീസുമായി 8-ാം തീയതിയാണ് പരമ്പര ആരംഭിക്കുന്നത്. രണ്ടാമത്തെ കുട്ടിയുണ്ടാകാന്‍ പോകുന്നതിനാലാണ് നിലവിലെ നായകന്‍ ജോ റൂട്ട് പരമ്പരയിലെ ആദ്യ ടെസ്റ്റ് മത്സരത്തില്‍ നിന്നും വിട്ടുനില്‍ക്കാന്‍ തീരുമാനിച്ചത്.
ഇംഗ്ലണ്ട് ടീമിനൊപ്പം പരിശീലനത്തിലുള്ള റൂട്ട് ഇന്ന് വീട്ടിലേക്ക് തിരികെ പോകും. തിരികെ എത്തിയാലും ഒരാഴ്ച ഐസൊലേഷനില്‍ കഴിഞ്ഞ ശേഷം മാത്രമേ ടീമിനൊപ്പം ചേരാന്‍ ജോ റൂട്ടിന് അനുവാദമുള്ളു എന്നും ഇംഗ്ലീഷ് ക്രിക്കറ്റ് ബോര്‍ഡ് അറിയിച്ചു. ജൂലൈ 13നാണ് റൂട്ട് ഇനി ടീമിനൊപ്പം ചേരുക. രണ്ടാം ടെസ്റ്റ് 16-ാം തീയതിയാണ് നടക്കുക.
ടീമിനെ മുന്നില്‍ നിന്നും നയിക്കാനറിയാവുന്ന മികച്ച താരമാണ് സ്‌റ്റോക്‌സെന്ന് പരിശീലകന്‍ ക്രിസ് സിര്‍വര്‍വുഡ് പറഞ്ഞു.തന്റെ ടീമംഗങ്ങളെക്കുറിച്ച് നല്ലധാരണയുള്ളയാലാണ് സ്്‌റ്റോക്‌സെന്നും ക്രിസ് വ്യക്തമാക്കി. നിലവില്‍ 30 അംഗടീമിലെ റൂട്ടും, പേസ് ബൗളര്‍ ജാമി ഓവര്‍ടണ്‍, സ്പിന്നര്‍ അമര്‍ വിര്‍ദി എന്നിവര്‍ ആദ്യ ടെസ്റ്റില്‍ പങ്കെടുക്കില്ല.
