സതാംപ്ടണ്: മാനവരാശിക്കുള്ള സന്ദേശത്തോടെ കൊറോണകാലത്തെ ആദ്യ അന്താരാഷ്ട്ര ക്രിക്കറ്റ് മത്സരത്തിന്റെ തുടക്കം. ഇന്നലെ ആരംഭിച്ച ഇംഗ്ലണ്ട്-വെസ്റ്റിന്ഡീസ് ആദ്യ ടെസ്ററ് മത്സരം തുടങ്ങും മുമ്പാണ് താരങ്ങളുടെ ഐക്യദാര്ഢ്യ പ്രഖ്യാപനം. അതിനൊപ്പം കൊറോണയില് ആഗോളതലത്തില് മരണപ്പെട്ടവര്ക്കും കഴിഞ്ഞ ദിവസം അന്തരിച്ച വെസ്റ്റിന്ഡീസ് ബാറ്റിംഗ് ഇതിഹാസം സര് എവര്ട്ടണ് വീകെസിനുമായി ഒരു മിനിറ്റ് മൗനം ആചരിച്ചു.
ബാറ്റിംഗിനിറങ്ങിയ രണ്ടു ഇംഗ്ലണ്ട് താരങ്ങളും അമ്പയര്മാരും ഗ്രൗണ്ടിലെ ഫീല്ഡിംഗിനുള്ള വെസ്റ്റിന്ഡീസ് താരങ്ങള്ക്കൊപ്പമാണ് സന്ദേശം നല്കിയത്. ഒരു കാല്മുട്ടിലിരുന്ന് വലതുകൈ ഉയര്ത്തിപ്പിടിച്ച് വര്ണ്ണവെറിക്കെതിരെയുള്ള സന്ദേശമാണ് പ്രതീകാത്മകമായി നല്കിയത്. കരീബിയന് താരങ്ങള് വലതുകൈയ്യില് ഒരു കറുത്ത ഗ്ലൗസും ധരിച്ചതും പ്രത്യേകതയായി.
സതാംപ്ടണിലെ ഏജിയാസ് ബൗള് എന്ന സ്റ്റേഡിയത്തിലാണ് ആദ്യ ടെസ്റ്റ് മത്സരം നടക്കുന്നത്. മഴ തുടക്കത്തില് പെയ്തതിനാല് കളി തുടങ്ങാന് വൈകിയതിനാലാണ് ഗ്രൗണ്ടിലിറങ്ങവേ താരങ്ങളെല്ലാം കളിക്കപ്പുറമുള്ള ഒരു ആഗോളവിഷയത്തെ നെഞ്ചിലേറ്റിയത്.
ബ്ലാക് ലൈവ്സ് മാറ്റേഴ്സ് എന്ന സന്ദേശം അമേരിക്കയിലെ ജോര്ജ്ജ് ഫ്ലോയിഡിന്റെ കൊലപാതകത്തോടെ ലോകവ്യാപക മുദ്രാവാക്യമായി മാറിയിരുന്നു. എന്നാല് അതിനിടെ കായികരംഗത്തെ താരങ്ങള് അവര്ക്കുണ്ടായ വര്ണ്ണവെറി അനുഭവങ്ങള് തുറന്നുപറയാന് തുടങ്ങിയത് വലിയ ചര്ച്ചയായി. വെസ്റ്റിന്ഡീസ് താരങ്ങളാണ് തങ്ങള് കറുത്തവര്ഗ്ഗക്കാരായതിനാല് പല ഭൂഖണ്ഡത്തിലും അവഗണന നേരിട്ട കാര്യം തുറന്നുപറഞ്ഞത്.
