ന്യൂഡൽഹി: ആഗോള സമ്പദ്‌വ്യവസ്ഥയിൽ അനിശ്ചിതത്വം തുടരുന്നതിനിടെ ഇന്ത്യയുടെ സാമ്പത്തിക വളർച്ചാ പ്രവചനം ഉയർത്തി അന്താരാഷ്‌ട്ര നാണയനിധി (IMF). 2026-27 സാമ്പത്തിക വർഷത്തിൽ ഇന്ത്യയുടെ മൊത്ത ആഭ്യന്തര ഉൽപ്പാദന (GDP) വളർച്ച 7 ശതമാനമായിരിക്കുമെന്നാണ് ഐഎംഎഫിന്റെ പുതിയ വിലയിരുത്തൽ. നേരത്തേ 6.4 ശതമാനമായിരുന്നു പ്രവചനം. ആഭ്യന്തര വിപണിയിലെ ശക്തമായ ആവശ്യകതയും സേവനമേഖലയിലെ മികച്ച പ്രകടനവും യുവശക്തിയുമാണ് വളർച്ചാ പ്രതീക്ഷ ഉയർത്താൻ പ്രധാന കാരണങ്ങളായി ചൂണ്ടിക്കാട്ടുന്നത്.
നേരത്തെ ലോകബാങ്കും റിസർവ് ബാങ്ക് ഓഫ് ഇന്ത്യയും (RBI) 2026-27 സാമ്പത്തിക വർഷത്തിലെ ഇന്ത്യയുടെ വളർച്ചാ പ്രവചനം 7.1 ശതമാനമായി ഉയർത്തിയിരുന്നു. ആഗോളതലത്തിൽ സാമ്പത്തിക സമ്മർദങ്ങൾ നിലനിൽക്കുമ്പോഴും ഇന്ത്യൻ സമ്പദ്‌വ്യവസ്ഥയുടെ അടിസ്ഥാന കരുത്ത് പ്രതീക്ഷ നൽകുന്നതാണെന്നാണ് പുതിയ വിലയിരുത്തലുകൾ വ്യക്തമാക്കുന്നത്.
ഐഎംഎഫിന്റെ കണക്കുകൾ പ്രകാരം ഇന്ത്യയുടെ വളർച്ച 2025ൽ 7.8 ശതമാനമായിരുന്നു. 2026ലും 2027ലും 7 ശതമാനം വീതം വളർച്ചയാണ് പ്രവചിക്കുന്നത്. ചൈനയുടെ വളർച്ച 2026ൽ 4.5 ശതമാനവും 2027ൽ 4 ശതമാനവുമായിരിക്കുമെന്നാണ് വിലയിരുത്തൽ. ആഗോള സാമ്പത്തിക വെല്ലുവിളികൾക്കിടയിലും ഉയർന്ന വളർച്ചാ നിരക്ക് നിലനിർത്താനുള്ള ഇന്ത്യയുടെ ശേഷിയാണ് പുതിയ പ്രവചനത്തിലൂടെ ശ്രദ്ധേയമാകുന്നത്.
