ആത്മവിശ്വാസം ഉണ്ടെങ്കില്‍ ഏത് പരിമിതിയേയും മറികടക്കാം. ഏത് സങ്കടത്തേയും സന്തോഷമാക്കി മാറ്റാം. ജീവിതത്തില്‍ ചിലപ്പോള്‍ അപ്രതീക്ഷിതമായി പല നഷ്ടങ്ങളും ഉണ്ടാകും. അത് ചിലപ്പോള്‍ നമ്മെ മാനസികമായും ശാരീരികമായും ബാധിച്ചേക്കാം. ശാരീരിക പ്രയാസങ്ങള്‍ക്ക് ഒരു പരിധി വരെ നമുക്ക് വൈദ്യ സഹായം തേടാം. എന്നാല്‍ മാനസികമായി തളര്‍ന്നാല്‍ അതില്‍ നിന്നും കരകയറാന്‍ എളുപ്പമാകില്ല. ഏത് പ്രതിസന്ധിയേയും ആത്മവിശ്വാസമുണ്ടെങ്കില്‍ മറികടക്കാം എന്ന് തെളിയിച്ചിരിക്കുകയാണ് മുന്‍ മിസ് കൊളംബിയ ഡാനിയേലാ അല്‍വാരസ്.
മൂന്നാഴ്‌ച്ച മുന്‍പാണ് റാമ്പുകളെ പ്രകമ്പനം കൊള്ളിച്ച അല്‍വാരസിന്റെ ഒരു കാല്‍ മുറിച്ചു മാറ്റിയത്. നഷ്ടത്തെ ഓര്‍ത്ത് നിരാശപ്പെട്ടിരിക്കാതെ ജീവിതത്തിന്റെ സന്തോഷങ്ങളെ തിരികെ എത്തിച്ച് മാതൃകയായിരിക്കുകയാണ് അല്‍വാരസ്. മുറിച്ചു മാറ്റിയ കാലുമായി നൃത്തം ചെയ്യുന്ന അല്‍വാരസിന്റെ വീഡിയോയാണ് ഇപ്പോള്‍ സാമൂഹ്യ മാദ്ധ്യമങ്ങളില്‍ വൈറലാകുന്നത്. സഹോദരന്‍ റിക്കി അല്‍വാരസിനൊപ്പമാണ് ഡാനിയേലാ അല്‍വാരസ് ഡാന്‍സ് ചെയ്യുന്നത്. ഒരു ബുദ്ധിമുട്ടിനും കഷ്ടപ്പാടിനും നമ്മെ തടയാന്‍ കഴിയില്ല. ജീവിതത്തില്‍ പോരാടാന്‍ തയ്യാറായിരിക്കണമെന്നു മാത്രം എന്ന അടിക്കുറിപ്പോടെയാണ് അല്‍വാരസ് വീഡിയോ പങ്കുവെച്ചിരിക്കുന്നത്.
ഉദര സംബന്ധമായ അസ്വസ്ഥതകള്‍ മാറ്റാനായി ഡാനിയേല ഒരു ശസ്ത്രക്രിയയ്‌ക്ക് വിധേയയായിരുന്നു. എന്നാല്‍ ശസ്ത്രക്രിയയ്‌ക്കിടെയുണ്ടായ ചില പ്രശ്‌നങ്ങള്‍ പരിഹരിക്കാന്‍ ഡാനിയേലയുടെ ഒരു കാല്‍ മുറിച്ചു മാറ്റേണ്ടി വന്നു. എന്നാല്‍ ഡാനിയേല തളര്‍ന്നില്ല. തന്റെ ജീവിതത്തെ വീണ്ടും പ്രകാശ പൂര്‍ണമാക്കാന്‍ തന്നാല്‍ കഴിയും വിധം ശ്രമിക്കുകയാണ് ഡാനിയേല.
