ലണ്ടന്: ഇംഗ്ലീഷ് പ്രീമിയര് ലീഗില് പോയിന്റ് നിലയില് മുന്നേറാന് ടീമുകളുടെ ജീവന്മരണ പോരാട്ടം. ഇന്നലെ നടന്ന പോരാട്ടങ്ങളില് കരുത്തന്മാര്ക്കു പലര്ക്കും കാലിടറി. ലീഗില് മൂന്നാം സ്ഥാനക്കാരായ ലെസ്റ്റര് സിറ്റിയെ ബേണ്മൗത്ത് ഒന്നിനെതിരെ നാലുഗോളുകള് ക്കാണ് അട്ടിമറിച്ചത്. രണ്ടാം മത്സരത്തില് ആഴ്സണലിനെ ഒന്നിനെതിരെ രണ്ടുഗോളുകള്ക്ക് തോല്പ്പിച്ച് ടോട്ടനവും മുന്നേറി. മറ്റ് മത്സരങ്ങളില് എവര്ട്ടണിനെ എതിരില്ലാത്ത മൂന്നു ഗോളുകള്ക്ക് വോള്വര്ഹാംപ്ടണ് അട്ടിമറിച്ചപ്പോള് ആസ്റ്റണ്വില്ല എതിരില്ലാത്ത രണ്ടു ഗോളുകള്ക്ക് ക്രിസ്റ്റല് പാലസിനേയും തകര്ത്തു.
വന് അട്ടിമറിയാണ് ലെസ്റ്ററിനെതിരെ ബേണ്മൗത്ത് നേടിയത്. ലീഗില് നാലാം സ്ഥാനത്തുള്ള ടീമിനെയാണ് 18-ാം സ്ഥാനത്തുള്ള ബേണ്മൗത്ത് 4-1ന് തൂത്തെറിഞ്ഞത്. ലെസ്റ്ററിന്റെ സൂന്സൂ ചുവപ്പുകാര്ഡു കണ്ട് പുറത്തുപോയ പോരാട്ടത്തില് സൊലാന്കേയുടെ ഇരട്ട ഗോളുകളുടെ മികവിലാണ് ബേണ്മൗത്ത് അതിഗംഭീര ജയം നേടിയത്. 23-ാം മിനിറ്റില് വാര്ഡിയുടെ ഗോളിലൂടെ മുന്നിലെത്തിയ ലെസ്റ്ററിനെ തീര്ത്തും നിഷ്പ്രഭമാക്കിയാണ് പിന്നീട് രണ്ടാം പകുതിയില് ബേണ്മൗത്ത് കളംനിറഞ്ഞത്. 66-ാം മിനിറ്റില് സ്റ്റാനിസ്ലാസ് പെനാല്റ്റിയിലൂടെ സമനില നേടി. സോളാന്കേ 67-ാം മിനിറ്റിലും 87-ാം മിനിറ്റിലും ലീഗ് മുന്നിരക്കാരുടെ വല ചലിപ്പിച്ചു. നിര്ഭാഗ്യം കൊണ്ടുവന്ന് 83-ാം മിനിറ്റില് എവാന്സ് സ്വന്തം ഗോള്പോസ്റ്റിലേക്ക് പന്തു തട്ടിയിട്ടതോടെ കളി പൂര്ണ്ണമായും ലെസ്റ്റര് കൈവിട്ടു.
രണ്ടാം മത്സരത്തില് ആഴ്സണല് തുടക്കത്തില് 16-ാം മിനിറ്റില് ലാക്കാസ്തേയിലൂടെ നേടിയ മുന്തൂക്കം കളഞ്ഞു കുളിച്ചു. ടോട്ടനത്തിനായി 19-ാം മിനിറ്റില് ടോട്ടനത്തിനായി സണ് ഹ്യൂ മിന്നും 81-ാം മിനിറ്റില് ആല്ഡെര്വീല്ഡുമാണ് ഗോളുകള് നേടിയത്.
