മുംബൈ: കൊറോണ വൈറസിന്റെ പശ്ചാത്തലത്തില് മുടങ്ങിയ ഐപിഎല് മത്സരങ്ങള് പുനരാരംഭിക്കാന് സാധ്യത. ഇതോടെ ഐപിഎല് മത്സരങ്ങള്ക്ക് യു എ ഇ വേദിയായേക്കുമെന്നാണ് റിപ്പോര്ട്ട്. ടി 20 ലോകകപ്പ് നീട്ടിവെയ്ക്കാന് ഐസിസി തീരുമാനിച്ചതോടെയാണ് ഐപിഎല്ലുമായി ബന്ധപ്പെട്ട ചര്ച്ചകള് സജീവമാകുന്നത്.
ഐപിഎല് നടത്തിപ്പുമായി ബന്ധപ്പെട്ട കാര്യങ്ങള് ചര്ച്ച ചെയ്യുന്നതിനായി ഐപി എല് ഭരണ സമിതി 10 ദിവസത്തിനുള്ളില് ചേരുമെന്ന് ഐപിഎല് ചെയര്മാന് ബ്രിജേഷ് പട്ടേല് വ്യക്തമാക്കി.
അടുത്ത പത്ത് ദിവസത്തിനുള്ളില് ഐപിഎല് ഭരണസമിതി ചേരും. ടൂര്ണമെന്റ് നടത്തിപ്പ്, സമയക്രമം തുടങ്ങിയ കാര്യങ്ങള് ഭരണ സമിതി ചര്ച്ച ചെയ്യും. ഇപ്പോഴത്തെ പദ്ധതി അനുസരിച്ച് 60 മത്സരങ്ങളുമായി പൂര്ണ്ണ രൂപത്തില് തന്നെ ഐപിഎല് നടത്തുമെന്നും അദ്ദേഹം വ്യക്തമാക്കി. ഐപിഎല് മത്സരങ്ങളുടെ വേദി യു എ ഇ ആകാന് സാധ്യതയുള്ളതായും പട്ടേല് പറഞ്ഞു. ഒക്ടോബര്-നവംബര് മാസങ്ങളില് ഐപിഎല് നടത്താനുള്ള പദ്ധതി ബി സി സി ഐ തയ്യാറാക്കിയിട്ടുണ്ട്. ഇംഗ്ലണ്ടില് അന്താരാഷ്ട്ര മത്സരം തുടങ്ങിക്കഴിഞ്ഞു. വിദേശ താരങ്ങള്ക്ക് യു എ ഇയിലെത്താന് വലിയ ബുദ്ധിമുട്ടുണ്ടാകില്ലെന്നതും യു എ ഇ വേദിയാക്കാന് അധികൃതരെ പ്രരിപ്പിക്കുന്നു.
