ന്യൂഡല്ഹി: ഡല്ഹിയില് ഞായറാഴ്ച പെയ്ത മഴ കടുത്ത ചൂടിനും ഈര്പ്പത്തിനും ആശ്വാസമായെങ്കിലും വിമാന സര്വീസുകളെ സാരമായി ബാധിച്ചു. മോശം കാലാവസ്ഥയും ശക്തമായ കാറ്റും കാരണം ഡല്ഹി വിമാനത്താവളത്തിലേക്ക് എത്തേണ്ടിയിരുന്ന 15 വിമാനങ്ങള് ജയ്പൂരിലേക്കും ലഖ്നൗവിലേക്കും വഴിതിരിച്ചുവിട്ടു.
വിമാനത്താവള അധികൃതരുടെ വിവരമനുസരിച്ച് 10 ആഭ്യന്തര വിമാനങ്ങളും അഞ്ച് അന്താരാഷ്ട്ര വിമാനങ്ങളുമാണ് പ്രതികൂല കാലാവസ്ഥയെ തുടര്ന്ന് തിരിച്ചുവിട്ടത്. ശക്തമായ കാറ്റും കുറഞ്ഞ ദൃശ്യപരതയും കാരണം വിമാനങ്ങളുടെ ലാന്ഡിങ്ങിനും ടേക്ക് ഓഫിനും തടസമുണ്ടായി.
അതേസമയം, മഴയെ തുടര്ന്ന് ഡല്ഹിയിലെ കാലാവസ്ഥ സുഖകരമായി മാറി. ഉച്ചയ്ക്ക് ഒരു മണിയോടെ താപനില 28 ഡിഗ്രി സെല്ഷ്യസിനടുത്തായിരുന്നു. കഴിഞ്ഞ 24 മണിക്കൂറിനിടെ നഗരത്തിന്റെ വിവിധ ഭാഗങ്ങളില് നേരിയതും മിതമായതുമായ മഴ ലഭിച്ചതായി ഇന്ത്യന് കാലാവസ്ഥാ വകുപ്പ് അറിയിച്ചു. ചിലയിടങ്ങളില് ഇടിമിന്നലോടുകൂടിയ മഴയും അനുഭവപ്പെട്ടു.
അടുത്ത രണ്ട് ദിവസത്തിനുള്ളില് പരമാവധി താപനില 2 മുതല് 3 ഡിഗ്രി സെല്ഷ്യസ് വരെ കുറയാന് സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു. മണിക്കൂറില് 10 മുതല് 15 കിലോമീറ്റര് വരെ വേഗത്തില് തെക്കുകിഴക്കന് കാറ്റ് വീശിയപ്പോള് പാലം മേഖലയിലുള്പ്പെടെ ചിലയിടങ്ങളില് മണിക്കൂറില് 37 കിലോമീറ്റര് വരെ വേഗത്തില് കാറ്റടിച്ചു.
ഇതിനിടെ, തെക്കുപടിഞ്ഞാറന് മണ്സൂണ് അടുത്ത നാല് ദിവസത്തിനുള്ളില് ഹരിയാന, പഞ്ചാബ്, രാജസ്ഥാന് സംസ്ഥാനങ്ങളുടെ ബാക്കി ഭാഗങ്ങളിലേക്കും വ്യാപിക്കുമെന്ന് കാലാവസ്ഥാ വകുപ്പ് അറിയിച്ചു. രാജസ്ഥാനില് അടുത്ത മൂന്ന് ദിവസം നേരിയതും മിതമായതുമായ മഴയ്ക്ക് സാധ്യതയുള്ളപ്പോള്, ചിലയിടങ്ങളില് ശക്തമായ മഴയ്ക്കും സാധ്യതയുണ്ട്.
ഹിമാചല് പ്രദേശിലും വിവിധ ഭാഗങ്ങളില് മഴ തുടരുകയാണ്. മണ്ഡി, സിര്മൗര് ജില്ലകളില് തിങ്കളാഴ്ചയും ചമ്പ, കാംഗ്ര, സിര്മൗര് ജില്ലകളില് ചൊവ്വാഴ്ചയും ശക്തമായതോ അതിശക്തമായതോ ആയ മഴയ്ക്ക് സാധ്യതയുള്ളതിനാല് ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. മഴയും മണ്സൂണിന്റെ വ്യാപനവും ഉത്തരേന്ത്യയിലെ വിവിധ സംസ്ഥാനങ്ങളില് വരും ദിവസങ്ങളിലും തുടരുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്.
