ലണ്ടന്‍: ലിവര്‍പൂള്‍ ഇംഗ്ലീഷ് പ്രീമിയര്‍ ലീഗ് കീരീടം ഇന്ന് തലയിലേറ്റും. ക്യാപ്റ്റന്‍ ജോര്‍ദ്ദാന്‍ ഹെന്‍ഡേഴ്‌സണും ടീമംഗങ്ങളും പ്രത്യേകം തയ്യാറാക്കിയ തട്ടില്‍ കയറിനിന്ന് ആരവം മുഴക്കും. ജൊഹാന്‍ ക്ലോപെന്ന പരിശീലകനൊപ്പം ചുവപ്പന്‍ ജഴ്‌സിയില്‍ ലിവര്‍പൂള്‍ ലീഗില്‍ സ്വപ്‌നതുല്യമായ മുന്നേറ്റമാണ് നടത്തിയത്. കാണികളില്ലാതെ സ്വന്തം തട്ടകമായ ആന്‍ഫീല്‍ഡില്‍ 30 വര്‍ഷത്തിന് ശേഷമുള്ള ചരിത്രമാണ് ലിവര്‍പൂള്‍ കുറിച്ചിരിക്കുന്നത്.
36 മത്സരങ്ങളിലായി 93 പോയിന്റുകളുമായിട്ടാണ് ലിവര്‍പൂള്‍ ലീഗില്‍ മുന്നില്‍ നില്‍ക്കുന്നത്. സീസണിന്റെ തുടക്കം മുതലേ ജയങ്ങള്‍ മാത്രം നെഞ്ചിലേറ്റിയുള്ളതായിരുന്നു ക്ലോപ്പിന്റെ തണലില്‍ ലിവര്‍പൂളിന്റെ കുതിപ്പ്. 36ല്‍ 30ലും ജയങ്ങള്‍. 3 സമനിലകളും അത്ര തന്നെ തോല്‍വികളും. മുന്‍ ചാമ്പ്യന്മാരായ മാഞ്ചസ്റ്റര്‍ സിറ്റിയുടെ റെക്കോഡായ 100 പോയിന്റ് കടക്കാനാകുമോ എന്നതില്‍ മാത്രമാണ് ഇനി ആരാധകരുടെ പ്രതീക്ഷ.
2019 ആഗസ്റ്റ് 10ന് നോര്‍വിച്ച് സിറ്റിക്കെതിരെയാണ് ലിവര്‍പൂളിന്റെ ലീഗിലെ ആദ്യമത്സരം നടന്നത്. 4-1ന്റെ ഗംഭീര ജയത്തോടെയാണ് ലിവര്‍പൂള്‍ സീസണ്‍ തുടങ്ങിയത്. ചെല്‍സിയേയും മാഞ്ചസ്റ്റര്‍ യുണൈറ്റഡിനേയും തോല്‍പ്പിച്ചാണ് ലീഗില്‍ മുന്നേറിയത്. ലീഗിലെ അവസാന ഘട്ടത്തില്‍ ലീഗ് ചാമ്പ്യന്‍പട്ടം ഉറപ്പിച്ച ശേഷം മാഞ്ചസ്റ്റര്‍ സിറ്റി എതിലില്ലാത്ത നാലു ഗോളുകള്‍ക്ക് തോല്‍പ്പിച്ചതാണ് ഒരു ക്ഷീണമായത്. ഇനി നാളെ ചെല്‍സിക്കെതിരേയും അവസാന മത്സരം ന്യൂകാസിലിനെതിരേയും മാത്രമാണ് ബാക്കിയുള്ളത്.
ആന്‍ഫീല്‍ഡില്‍ ഇന്ന് നടക്കുന്ന പുരസ്‌കാരച്ചടങ്ങില്‍ 30 വര്‍ഷത്തിന് ശേഷമാണ് ലിവര്‍പൂള്‍ കിരീടം ഉയര്‍ത്താന്‍ പോകുന്നത്. ഫുട്‌ബോള്‍ ഇതിഹാസമായ സര്‍ കെന്നി ഡാല്‍ഗിഷിന്റെ സാന്നിധ്യത്തിലാണ് ലിവര്‍പൂളിനെ കിരീടമണിയിക്കുക.ലിവര്‍പൂളിനെ ലീഗ് കിരീടം അണിയിച്ച അവസാനത്തെ പരിശീലകന്‍ എന്നതാണ് ഡാല്‍ഗിഷിന്റെ സവിശേഷത. മുഹമ്മദ് സലായാണ് ലിവര്‍പൂളിന്റെ സീസണിലെ സൂപ്പര്‍ താരം. 23 ഗോളുകളും 11 അസിസ്റ്റുകളുമായി സല കളംനിറഞ്ഞു. തൊട്ടുപിന്നില്‍ 19 ഗോളുകളോടെ സാദിയോ മാനേയും ജയങ്ങള്‍ക്ക് കരുത്തേകി.
