ഇന്ത്യയിലെ പഴയ കാർ നിർമാതാക്കളായ പ്രീമിയർ ഓട്ടോമൊബൈൽസ് ലിമിറ്റഡിന്റെ പദ്മിനി പുത്തൻ ലുക്കിൽ. ഫിയറ്റ് 1100 അടിസ്ഥാനമാക്കിയുള്ള ഐതിഹാസിക വാഹനങ്ങൾ ഇന്ത്യക്കാർക്ക് സമ്മാനിച്ചിട്ടുണ്ടെങ്കിലും നിർമാതാക്കൾ ഇന്ന് വിപണിയിൽ ഇല്ല. പക്ഷെ അവർ പുറത്തിറക്കിയ വാഹനങ്ങൾക്ക് ആരാധകർ നിരവധിയാണ് ഇന്നും. എന്നിരുന്നാലും ഏറ്റവും കൂടുതൽ ആരാധകർ പ്രീമിയർ പദ്മിനിക്ക് തന്നെയാണ്.
പൂനെ ആസ്ഥാനമായുള്ള RASN ഡിസൈൻസാണ് സന്ദീപ് ഷിംഗേഡിന്റെ ഉടമസ്ഥതയിലുള്ള പദ്മിനിയെ കസ്റ്റമൈസ് ചെയ്തിരിക്കുന്നത്. വെള്ള നിറത്തിലുള്ള മുൻ വശവും ഓറഞ്ച് നിറത്തിലുള്ള പിൻ വശവുമാണ് ഈ പദ്മിനിയുടെ മനോഹാരിത. കൂടാതെ ഇടയിൽ ഒരു നീല വരയും കാണാൻ സാധിക്കും.
ബ്രൗൺ നിറത്തിലുള്ള കാർ ഇത്തരമൊരു ലുക്കിലേക്ക് വരാനായി മൂന്ന് കോട്ട് പ്രൈമർ, രണ്ട് ലെയർ ബേസ് കോട്ട്, നാല് ലെയർ ക്ലിയർ കോട്ട് എന്നിവ ആവശ്യമായി വന്നു. കൂടാതെ കസ്റ്റമൈസ്ഡ് സ്റ്റീൽ വീലുകൾ, സ്മോക്ക്ഡ് ടെയിൽ ലാമ്പുകൾ, ഒരു കസ്റ്റം നമ്പർപ്ലേറ്റ് ലൈറ്റ്, ടേൺ-ഇൻഡിക്കേറ്ററുകൾ എന്നിവയും പദ്മിനിയുടെ പുതിയ ഭാവത്തിന് മാറ്റുകൂട്ടുന്നു. ഒറിജിനൽ ഫിയറ്റ് 1100 പോലെയുള്ള ഫ്യുവൽ ഫില്ലറും ഇതിലുണ്ട്.
സീറ്റുകൾക്ക് സമാനമായ രീതിയിൽ ഡോർ പാനലുകളെയും മോഡിഫൈ ചെയ്തിട്ടുണ്ട്. പദ്മിനിയുടെ പുറംഭാഗത്തിന് സമാനമായ കളർ കോമ്പിനേഷൻ തന്നെയാണ് ഡാഷ് ബോർഡിലും ഒരുക്കിയിരിക്കുന്നത്. പാർസൽ ട്രേയ്ക്ക് താഴെയും മുൻ സീറ്റുകൾക്ക് താഴെയും കാബിനറ്റ് ലൈറ്റ് ലഭിക്കാനുള്ള സംവിധാനവും ഒരുക്കിയിരിക്കുന്നു.
പഴയ പദ്മിനിയെ കൂടുതൽ മനോഹരിയാക്കിയ ഈ മോഡിഫിക്കേഷന് 1089CC നാച്ചുറലി ആസ്പിരേറ്റഡ് ഇൻലൈൻ ഫോർ പെട്രോൾ എഞ്ചിൻ ഉള്ളതിനാൽ 42bhp കരുത്ത് ഉൽപ്പാദിപ്പിക്കാനുള്ള ശേഷിയും ഉണ്ട്.