ഒരു തുള്ളി വെള്ളം പോലും തറയില് വീഴാതെ ഗ്ലാസുകള് കറക്കുന്ന യുവാവാണ് ഇപ്പോള് സമൂഹമാധ്യമങ്ങളില് കൈയ്യടി നേടുന്നത്. നീളമുള്ള ഒരു കയറിന്റെ രണ്ടറ്റത്തുമുള്ള പെന്ഡുലത്തില് രണ്ട് ഗ്ലാസുകളില് വെള്ളം നിറച്ച് തലയ്ക്ക് ചുറ്റും മുകളിലും താഴെയുമായി, യുവാവ് വട്ടത്തില് ശക്തമായി കറക്കുന്ന വീഡിയോ സമൂഹമാധ്യമങ്ങളിൽ വൈറലാവുകയാണ്.
യുവാവ് ഇത് ചെയ്യുമ്പോള് ഒരു തുള്ളി വെള്ളം പോലും നിലത്ത് വീഴുന്നില്ല എന്നതാണ് ഏവരേയും അത്ഭുതപ്പെടുത്തുന്നത്. ഒറ്റ നോട്ടത്തില് ഇത് അത്ഭുതമെന്നോ വിസ്മയമെന്നോ മാന്ത്രികമെന്നോ തോന്നാം. എന്നാല് ഇത് അതൊന്നുമല്ല, കേവലം ഗുരുത്വാകര്ഷണമാണ്. വെള്ളം നിറച്ച ഗ്ലാസുകള് ചുറ്റിക്കറക്കുമ്പോഴും വെള്ളം ഗ്ലാസിനകത്ത് തന്നെ നില്ക്കുന്നു എന്ന് ഉറപ്പുവരുത്തുന്ന ഭൗതിക ശാസ്ത്രത്തിലെ ഒരു ട്രിക്കാണിത്.
ചെന്നൈ സ്വദേശിയായ ശരത്ത് ആണ് വീഡിയോ ആദ്യം ഇന്സ്റ്റഗ്രാമില് പങ്കുവെച്ചത്. ഭൗതിക ശാസ്ത്രത്തിലെ മനോഹര പ്രദര്ശനം എന്ന അടിക്കുറിപ്പോടെ അടുത്തിടെ ഫിസിക്സ് ആന്റ് അസ്ട്രോണമി സോണ് എന്ന ട്വിറ്റര് അക്കൗണ്ടിലും വീഡിയോ പങ്കുവെച്ചു. ഇതോടെയാണ് സംഭവം തരംഗമാകുന്നത്. 1.7 ദശലക്ഷം കാഴ്ച്ചക്കാരും 77,000 ലൈക്കുകളുമാണ് ഒറ്റ ദിവസം കൊണ്ട് വീഡിയോ സ്വന്തമാക്കിയത്. നിരവധി നല്ല കമന്റുകളും ലഭിച്ചിട്ടുണ്ട്.
അതേസമയം വെള്ളം നിറച്ചൊരു ഗ്ലാസിനെ തലകീഴായി മറിക്കുമ്പോഴും ഒരു തുള്ളി വെള്ളം പോലും പുറത്ത് വീഴാതിരിക്കുന്നത് കേന്ദ്രീകൃത ബലവും ജഡത്വവും കൊണ്ടാണെന്നാണ് സയന്സ് മാഗസീനായ സയന്റിഫിക് അമേരിക്കന് പറയുന്നത്.
