മൃഗങ്ങളോട് സ്‌നേഹം കാണിക്കുന്ന ധാരാളം പേര്‍ നമുക്ക് ചുറ്റുമുണ്ട്. ഇതില്‍ ചിലരുടെയെങ്കിലും വീഡിയോ സോഷ്യല്‍ മീഡിയയില്‍ വൈറലായിട്ടുമുണ്ട്. തന്നോട് സ്‌നേഹം കാണിക്കുന്ന മനുഷ്യനോട് ഒപ്പം ചേര്‍ന്ന് നില്‍ക്കുന്ന ഓമനകളുടെ വീഡിയോ നമ്മുടെ ഹൃദയം കവരാറുമുണ്ട്. ഇപ്പോഴിതാ ഒരു പച്ചക്കറി വില്‍പ്പനക്കാരിയുടെ വീഡിയോയാണ് സോഷ്യല്‍മീഡിയയില്‍ വൈറലാവുന്നത്.
റോഡരികില്‍ നിന്ന് പച്ചക്കറി വില്‍ക്കുന്ന ഈ സ്ത്രീ മയിലിന് തീറ്റ കൊടുക്കുന്നതാണ് വീഡിയോയില്‍. കുറച്ച് ദിവസങ്ങള്‍ക്ക് മുമ്പ് ട്വിറ്ററില്‍ പ്രത്യക്ഷപ്പെട്ട വീഡിയോ മറ്റ് സോഷ്യല്‍മീഡിയകളിലും വൈറലായി. നിരവധി പേരാണ് സ്ത്രീയെ പ്രശംസിച്ച് രംഗത്തെത്തിയത്. റോഡരികില്‍ പച്ചക്കറി വില്‍ക്കുന്ന ഇവരുടെ സമീപത്തേക്ക് നേരത്തെയും ഈ മയില്‍ എത്തിയിരുന്നുവെന്ന് വീഡിയോ കാണുമ്പോള്‍ മനസിലാകും. അത്ര പരിചയത്തോടെയാണ് മയില്‍ സ്ത്രീയുടെ കൈയില്‍ നിന്നും തീറ്റ കൊത്തിയെടുക്കുന്നത്.
ടിങ്കു വെങ്കിടേഷ് എന്നയാളാണ് വീഡിയോ പങ്കുവെച്ചത്. മുതിര്‍ന്ന ഇന്ത്യന്‍ ഫോറസ്റ്റ് സര്‍വീസ് ഓഫീസര്‍ രമേശ് പാണ്ഡെ സ്ത്രീയെ പ്രശംസിച്ചു. സമാധാനപരവും സ്നേഹനിര്‍ഭരവുമായ സഹവര്‍ത്തിത്വത്തിന്റെ ഉദാഹരണമെന്നാണ് രമേശ് പാണ്ഡെ വീഡിയോയെ പ്രശംസിച്ചത്: ‘നമ്മുടെ സമ്പന്ന സംസ്‌കാരം മൃഗങ്ങളോടുള്ള അനുകമ്പയുടെയും സ്‌നേഹത്തിന്റെയും ഉദാഹരണമായ മനോഹരമായ ഒരു വീഡിയോയെന്നും അദ്ദേഹം ട്വിറ്ററില്‍ കുറിച്ചു.
https://twitter.com/rameshpandeyifs/status/1289571817972097026?ref_src=twsrc%5Etfw%7Ctwcamp%5Etweetembed%7Ctwterm%5E1289571817972097026%7Ctwgr%5E&ref_url=https%3A%2F%2Fwww.ndtv.com%2Foffbeat%2Fviral-video-of-vegetable-seller-feeding-a-peacock-wins-hearts-2273810
മൂന്ന് ദിവസം മുമ്പ് ട്വിറ്ററില്‍ പോസ്റ്റ് ചെയ്ത വീഡിയോ ഇതിനോടകം 4.9 ലക്ഷത്തിലധികം പേര്‍ കണ്ടു കഴിഞ്ഞു. മയിലിന് സ്‌നേഹപൂര്‍വം തീറ്റ കൊടുക്കുന്ന ഈ സ്ത്രീയെ പ്രശംസിച്ച് നിരവധിപേരാണ് വീഡിയോയ്‌ക്ക് താഴെ കമന്റിട്ടത്. ആയിരത്തിലധികം പേര്‍ വീഡിയോ ലൈക്ക് ചെയ്തു. ഹൃദയസ്പര്‍ശിയായ വീഡിയോയെന്ന് ഒരാള്‍ കമന്റ് ചെയ്തു. സുന്ദരിയായ മയിലിന്റെ വിശ്വാസം നേടിയെടുക്കാന്‍ സ്ത്രീക്ക് കഴിഞ്ഞെന്നാണ് മറ്റൊരാളുടെ കമന്റ്.
