തൊടികളിലും പറമ്പിലുമായി നാം കണ്ടുവരുന്ന ഒരു ചെടിയാണ് ഞൊട്ടങ്ങ. ചെറുപ്പത്തില്‍ ഇതിന്റെ കായ കഴിക്കാത്തവരും നെറ്റിയില്‍ പൊട്ടിച്ച് കളിക്കാത്തവരുമായി ആരും തന്നെ കാണില്ല. എന്നാല്‍ ഇന്നത്തെ തലമുറയ്‌ക്ക് ഇതൊരു പുതിയ അതിഥിയാണ് വീടിന്റെ മതില്‍ക്കെട്ടിനുള്ളിമാത്രം ഒതുങ്ങി ജീവിക്കുന്ന കുട്ടികള്‍ക്ക് ഇത് തികച്ചും അപരിചിതനായ ഒരു ചെടിയാണ്. ഇതിന്റെ ഔഷധ ഗുണം അറിഞ്ഞാല്‍ ആരും തന്നെ ഈ ചെറിയ അവഗണിക്കില്ല. അത്രയും കേമനാണ് ഞൊട്ടങ്ങ. നമ്മുടെ നാട്ടില്‍ ഇതിനു വലിയ പ്രാധാന്യം ഇല്ലെങ്കിലും കടല്‍ കടന്നാല്‍ ഇവന്‍ രാജാവാണ്. ഗോള്‍ഡന്‍ ബെറി എന്ന പേരിലാണ് പുറം രാജ്യങ്ങളില്‍ ഈ ഔഷധ സസ്യം അറിയപ്പെടുന്നത്.
ബുദ്ധിവികാസത്തിനും, ശരീര വളര്‍ച്ചയ്‌ക്കും ഏറെ ഉപയോഗപ്രദമാണ് ഞൊട്ടങ്ങ. കുട്ടികളിലെ അപസ്മാരം, ഓട്ടിസം എന്നിവയ്‌ക്ക് ഫലപ്രദമാണ്. അര്‍ബുദത്തെ തടയുകയും അത് വ്യാപിക്കുന്നത് ഇല്ലാതാക്കുകയും ചെയ്യുന്നു. വൃക്കരോഗങ്ങള്‍, മൂത്രതടസ്സം, മലബന്ധം എന്നിവ ഇല്ലാതാക്കുന്നു. ചീത്ത കൊളസ്‌ട്രോളിന്റെ അളവ് കുറവായതിനാല്‍ ഹൃദ്രോഗത്തെ ഒരു പരിധിവരെ തടയുന്നു. ഭക്ഷ്യനാരുകള്‍ കൂടുതല്‍ അടങ്ങിയിരിക്കുന്നതിനാല്‍ പ്രമേഹത്തെ ഇല്ലാതാക്കുന്നു. കലോറി കുറവായതിനാല്‍ ശരീരഭാരം കുറയ്‌ക്കാനും സഹായിക്കുന്നു.
രോഗ പ്രതിരോധശേഷി കൂട്ടാനും, പനി, നീര്‍ക്കെട്ട് തുടങ്ങിയ അസുഖങ്ങള്‍ക്കു കാരണമായ വൈറസ് ബാധ തടയാനും സഹായിക്കുന്നു. മഞ്ഞപ്പിത്തം, വാതം എന്നിവയ്‌ക്കുളള ഒറ്റമൂലിയാണ് ഈ ഔഷധസസ്യം. ജൂലൈ മുതല്‍ ഒക്ള്‍ടോബര്‍ വരെയാണ് ഇത് പൂക്കുന്നത്. ഇതിന്റെ കായ വളരെ സ്വാദിഷ്ടമാണ്. ആയുര്‍വേദ മരുന്നുകള്‍ ഉണ്ടാക്കുന്നതിനളള കൂട്ടായും ഇതുപയോഗിക്കാറുണ്ട്. നാട്ടിന്‍ പുറത്ത് ധാരാളമായി കണ്ടുവരുന്ന ഞൊട്ടങ്ങ ഇനി ആരും തന്നെ കണ്ടില്ലെന്നു വെക്കരുത്. ഈ ചെടിയുടെ ഔഷധ ഗുണങ്ങള്‍ അറിയാതെ പോകരുത്.
