കൊറോണ തടയാൻ സ്വർണ്ണവും വെള്ളിയും പതിച്ച മാസ്ക്കോ ? ഞെട്ടണ്ട,ഇസ്രായേലിൽ സ്വർണ്ണാഭരണങ്ങൾ നിർമ്മിക്കുന്ന ഒരു കമ്പനിയാണ് 1 .5 ദശലക്ഷം ഡോളർ വിലവരുന്ന സ്വർണ്ണവും വെള്ളിയും പതിച്ച മാസ്ക് ഉണ്ടാക്കുന്നത് . ലോകത്തിലെ ഏറ്റവും വിലകൂടിയ മാസ്കുകളിൽ ഒന്നായിരിക്കും ഇപ്പോൾ നിർമ്മാണത്തിൽ ഇരിക്കുന്ന ഈ മാസ്ക് .
കൊറോണയുടെ പശ്ചാത്തലത്തിൽ എല്ലാവരും മാസ്ക് ധരിക്കുക എന്നത് നിലനില്പിന്റെ ഭാഗമായതോടു കൂടി മാസ്കിൽ വ്യത്യസ്തത കൊണ്ടുവരാനുള്ള ശ്രമത്തിലാണ് പല വ്യക്തികളും സ്ഥാപനങ്ങളും . ഇതിന്റെ ഭാഗമായിട്ടാണ് അമേരിക്കയിൽ സ്ഥിര താമസമാക്കിയ ചൈനീസ് ബിസിനസ്സുകാരൻ ഇത്തരത്തിലുള്ള വില കൂടിയ മാസ്ക് നിർമ്മിക്കാൻ ഇസ്രായേൽ കമ്പനിയെ ഏല്പിച്ചത് .
പതിനെട്ട് ക്യാരറ്റ് വരുന്ന വെളുത്ത നിറമുള്ള സ്വർണ്ണത്തിൽ നിർമ്മിക്കുന്ന മാസ്കിൽ , മൂവായിരത്തി അറുനൂറ് വെള്ളയും കറുപ്പും നിറമുള്ള വജ്രങ്ങളാണ് പതിപ്പിക്കുന്നത് . കൂടാതെ ഏറ്റവും ഗുണനിലവാരമുള്ള എൻ 99 ഫിൽറ്ററുകളും മാസ്കിൽ ഘടിപ്പിക്കുന്നതാണ് .
ഇസ്രായേൽ കമ്പനിയുടെ ഉടമസ്ഥൻ പറഞ്ഞത് , മാസ്ക് നിർമ്മിക്കാൻ ആവശ്യപ്പെട്ട വ്യക്തിക്ക് രണ്ടു നിബന്ധനകളെ ഉണ്ടായിരുന്നുള്ളൂ . ഒന്ന് – നിർമ്മാണം ഈ വർഷം തന്നെ പൂർത്തിയാക്കണം എന്നും , രണ്ടു – മാസ്ക് ലോകത്തിൽ ഏറ്റവും വില കൂടിയതായിരിക്കണം എന്നുള്ളതുമായിരുന്നു . രണ്ടാമത്തെ നിബന്ധനയാണ് ഏറ്റവും എളുപ്പത്തിൽ പാലിക്കാൻ സാധിക്കുന്നത് എന്നും കമ്പനിയുടെ ഉടമസ്ഥൻ പറഞ്ഞു
ഇരുനൂറ്റിഎഴുപത് ഗ്രാം തൂക്കമുള്ള ഈ മാസ്ക് എന്നും ധരിക്കുക എന്നുള്ളത് പ്രവർത്തികമായ കാര്യമല്ല . എന്നിരുന്നാലും വാർത്തകളിൽ നിറയാൻ തീർച്ചയായും ഈ വിലകൂടിയ മാസ്ക് സഹായിക്കും . ഇസ്രായേൽ കമ്പനിയുടെ ഉടമയുമായി അദ്ദേഹത്തിന്റെ നിർമ്മാണശാലയിൽ വെച്ച് നടന്ന അഭിമുഖത്തിൽ , അദ്ദേഹം മാസ്കിന്റെ ചില ഭാഗങ്ങൾ കാട്ടി കൊടുക്കയുണ്ടായി . ഇത്തരത്തിലുള്ള മാസ്ക് നിർമ്മിക്കാൻ അവസരം കിട്ടിയതിൽ സന്തോഷിക്കുന്നു എന്നും , തന്റെ ജോലിക്കാർക്ക് ഇതുമൂലം ഗുണം ഉണ്ടാകും എന്നും അദ്ദേഹം കൂട്ടി ചേർത്തു .
