വിമാനങ്ങളിലെ ഒരു പ്രധാനപ്പെട്ട ഭാഗമാണ് ബ്ലാക് ബോക്സ്. വിമാനങ്ങളും മറ്റും തകര്ന്ന് വീഴുമ്പോള് അപകടകാരണം കണ്ടെത്താന് ആദ്യം അന്വേഷിക്കുന്നത് വിമാനത്തില് ഘടിപ്പിച്ചിരിക്കുന്ന ഇത്തരം ബ്ലാക് ബോക്സുകളാണ്. ബ്ലാക് ബോക്സില് നിന്നും ഇതുമായി ബന്ധപ്പെട്ട നിര്ണ്ണായക വിവരങ്ങള് ലഭിക്കും എന്നതാണ് .ഇതിന് പ്രധാന കാരണം. വിമാനങ്ങളില് ഘടിപ്പിച്ചിട്ടുള്ള ബ്ലാക് ബോക്സ് എന്താണെന്നും ഇതിന്റെ കണ്ടുപിടുത്തത്തെക്കുറിച്ചുമാണ് വേള്ഡ് ഓഫ് ഇന്വെന്ഷന്സിന്റെ അദ്ധ്യായത്തില് നാം പരിചയപ്പെടാന് പോകുന്നത്.
പറക്കുന്ന വിമാനത്തിന്റെ അവസ്ഥയും പ്രവര്ത്തനവും തുടര്ച്ചയായി രേഖപ്പെടുത്ത ഉപകരണമാണ് ബ്ലാക് ബോക്സ്. 1953 ല് ഓസ്ട്രേലിക്കാരനായ ഡോ. ഡേവിഡ് വാറനാണ് ബ്ലാക് ബോക്സ് കണ്ടുപിടിച്ചത്. അക്കാലത്ത് നിലവില് ഉണ്ടായിരുന്ന ബ്രിട്ടീഷ് കോമെറ്റ് ജെറ്റ് എയര്ലൈന്സിന്റെ വിമാനങ്ങള് തുടര്ച്ചയായി തകരുമായിരുന്നു. ഇതിന്റെ കാരണം കണ്ടെത്താന് അധികൃതര് ഒരു വിദഗ്ധ സംഘത്തെ ചുമതലപ്പെടുത്തി. ആ സംഘത്തിലെ അംഗമായിരുന്നു ഡേവിഡ് വാറന്.
വിമാനങ്ങളുടെ കോക് പിറ്റില് സംഭവിക്കുന്ന കാര്യങ്ങള് കൃത്യമായി രേഖപ്പെടുത്താന് ഒരു ഉപകരണം ഉണ്ടാക്കിയാല് തകര്ച്ചയുടെ കാരണം കണ്ടെത്താമെന്ന് അദ്ദേഹം നിര്ദ്ദേശിച്ചു. കോക്പിറ്റില് നടക്കുന്ന സംഭവങ്ങള് രേഖപ്പെടുത്താന് കാന്തശക്തി ഉപയോഗിച്ചുള്ള റെക്കോര്ഡിംഗ് രീതിയാണ് അദ്ദേഹം തെരഞ്ഞെടുത്തത്. തീയില് നശിക്കാത്ത ഒരു ആസ്ബസ്റ്റോസ് പെട്ടിക്കുള്ളില് അദ്ദേഹം രണ്ട് റെക്കോര്ഡറുകള് ഘടിപ്പിച്ചു. പിന്നീട് ഈ റെക്കോര്ഡറുകള് വിമാനത്തിന്റെ പിന്ഭാഗത്ത് സ്ഥാപിച്ചു. ഗോളാകൃതിയിലുളള ബ്ലാക് ബോക്സിയിരുന്നു വാറന് നിര്മ്മിച്ചത്. വിമാനം തകര്ന്നു വീണാല് സംഭവസ്ഥലത്തു നിന്നും ഉരുണ്ടു പോകാന് വേണ്ടിയായിരുന്നു വാറന് ഗോളാകൃതിയിലുള്ള ബ്ലാക് ബോക്സ് ഉണ്ടാക്കിയത് എന്നാണ് പറയപ്പെടുന്നത്. പെട്ടെന്ന് തിരിച്ചറിയുന്നതിനായി ബ്ലാക് ബോക്സിന് ഓറഞ്ച് നിറവും നല്കി.പിന്നീട് നിരവധി പരീക്ഷണങ്ങള്ക്ക് ശേഷമാണ് ഇന്ന് കാണുന്ന ചതുരാകൃതിയിലുള്ള ബ്ലാക് ബോക്സുകള് രൂപപ്പെടുത്തിയെടുത്തത്.
പ്രധാനമായും രണ്ട് ഉപകരണങ്ങളാണ് ബ്ലാക് ബോക്സുകളില് അടങ്ങിയിരിക്കുന്നത്. ഫ്ളൈറ്റ് ഡാറ്റാ റെക്കോര്ഡര്, കോക് പിറ്റ് വോയിസ് റെക്കോര്ഡര് എന്നിവയാണ് ഈ ഉപകരണങ്ങള്. വിമാനത്തിന്റെ വേഗം, പറക്കുന്ന ഉയരം, വിമാനം പോകുന്ന ഭാഗം,തുടങ്ങിയ നിര്ണ്ണായക വിവരങ്ങള് ഫ്ളൈറ്റ് ഡാറ്റ റെക്കോര്ഡര് അപ്പപ്പോള് രേഖപ്പെടുത്തും. കോക് പിറ്റ് വോയ്സ് റെക്കോര്ഡര് ആകട്ടെ വിമാനത്തില് നടക്കുന്ന എല്ലാ ശബ്ദങ്ങളും രേഖപ്പെടുത്തുന്നു.
