ഇന്ത്യയിൽ എല്ലായിടത്തും കാണപ്പെടുന്ന ഒരു ചെടിയാണ് തുളസി. ആയുർവേദ ചികിത്സയിൽ പ്രധാന സ്ഥാനവും തുളസിക്ക് തന്നെ. പച്ചനിറത്തിലുള്ള തുളസിയെ രാമ തുളസി അല്ലെങ്കിൽ ലക്ഷ്മി തുളസിയെന്നും ചാര നിറത്തിലുള്ള തുളസിയെ കൃഷ്ണ തുളസിയെന്നുമെന്നാണ് പറയുന്നത്.
ബാക്ടീരിയ, ചർമ്മരോഗങ്ങൾ എന്നിവയെ പ്രതിരോധിക്കുവാനും പ്രതിരോധ ശേഷി വർദ്ധിപ്പിക്കുവാനുമാണ് തുളസി ഉപയോഗിക്കുക. വീടുകളിൽ ഉണ്ടാക്കുന്ന മരുന്നുകളിൽ തുളസിയുടെ സ്ഥാനം എടുത്ത് പറയേണ്ടത് തന്നെയാണ്.
ചുമ, തൊണ്ടവേദന, ഉദരരോഗങ്ങൾ, ത്വക്ക് രോഗങ്ങൾ എന്നിവയ്‌ക്കുള്ള ഔഷധമായി തുളസി ഉപയോഗിക്കുന്നു. തുളസിയില ഉണക്കി പൊടിച്ച് നാസിക ചൂർണമായി ഉപയോഗിച്ചാൽ മൂക്കടപ്പ്, ജലദോഷം എന്നിവ ഇല്ലാതാവും. തുളസിനീരും അതേ അളവിൽ തേനും കൂടി ചേർത്ത് കഴിച്ചാൽ വസൂരിക്ക് ശമനം ഉണ്ടാകും. തുളസിനീരിൽ കുരുമുളക് പൊടി ചേർത്ത് കഴിച്ചാൽ ജ്വരം ഇല്ലാതാകും. തുളസി ഇട്ടു തിളപ്പിച്ചാറിയ വെള്ളം കണ്ണിലൊഴിച്ചാൽ ചെങ്കണ്ണ് മാറും. മുഖക്കുരു മാറുവാനായി തുളസിയിലയും പാടകിഴങ്ങും ചേർത്ത് അരച്ച് മുഖത്ത് പുരട്ടിയാൽ മതി. തുളസി നീരും പച്ച മഞ്ഞളും ചേർത്ത് പുരട്ടുന്നത് ചിലന്തി വിഷബാധയ്‌ക്ക് ശമനം ഉണ്ടാകാൻ കാരണമാകുന്നു. തുളസിയിലനീര് രാവിലെയും വൈകീട്ടും കുടിക്കുന്നത് മഞ്ഞപ്പിത്തം, മലേറിയ, വയറുകടി എന്നീ രോഗങ്ങൾ ഇല്ലാതിരിക്കാൻ സഹായിക്കും.
തുളസിയിൽ അടങ്ങിയിരിക്കുന്ന ഒലിയോനോലിക് ആസിഡ്, ഉർസോലിക് ആസിഡ്, റോസമരിനിക് ആസിഡ്, യൂഗെനോൽ തുടങ്ങീ ഘടകങ്ങൾ ആണ് തുളസിക്ക് ഇത്രയധികം ഗുണങ്ങൾ ഉണ്ടാവാൻ കാരണം. ഔഷധ പ്രാധാന്യമുള്ള തുളസിക്ക് ജ്യോതിഷ പ്രാധാന്യം കൂടിയുണ്ട്.
പണ്ടൊക്കെ ആളുകൾ തുളസിയില ചെവിയുടെ പിറകിൽ ചൂടാറുണ്ടായിരുന്നു. എന്നാൽ നാണക്കേട് എന്ന് കരുതി പുതിയ തലമുറയിലെ ആരും തന്നെ ഇപ്പോൾ അങ്ങനെ ചെയ്യാറില്ല. മനുഷ്യശരീരത്തിലെ ആഗിരണശക്തി കൂടുതലുള്ള ഭാഗമാണ് ചെവി എന്ന് പഴമക്കാർ വിശ്വസിച്ചിരുന്നു. അതുകൊണ്ടാണ് അവർ ചെവിയുടെ പിന്നിൽ തുളസിയില വെച്ചിരുന്നത്.
കൂടാതെ പേഴ്‌സിൽ തുളസിയില സൂക്ഷിക്കുന്നത് നല്ലതാണെന്നും പറയുന്നു. എവിടെയെങ്കിലും യാത്ര പോകുന്ന സമയത്ത് പേഴ്‌സിൽ തുളസിയില ഉണ്ടെങ്കിൽ യാത്ര ശുഭകരമായി ലക്ഷ്യസ്ഥാനത്ത് എത്തുമെന്നാണ് വിശ്വാസം.
സാധാരണയായി പേഴ്‌സിൽ പണം നിറയാൻ പല ജ്യോതിഷ സഹായങ്ങളും മിക്കവരും തേടാറുണ്ട്. അതിൽ പ്രധാനം തുളസിയില തന്നെയാണെന്നാണ് പറയപ്പെടുന്നത്. തുളസിയിലയിൽ മഹാവിഷ്ണുവിന്റെയും മഹാലക്ഷ്മിയുടെയും സാന്നിധ്യം ഉണ്ടെന്നും പറയുന്നു.
തുളസി മാല ധരിക്കുന്നവർക്കും തുളസിക്കാട് കണ്ട് മരിക്കുന്നവർക്കും മോക്ഷപ്രാപ്തി ഉണ്ടാകും എന്നാണ് പഴമക്കാർ പറയുന്നത്. ആശുദ്ധിയുള്ളപ്പോൾ തുളസിയെ സ്പർശിക്കരുതെന്നും അവർ പറയുന്നു.
തുളസി തറ കെട്ടി, കൃഷ്ണ തുളസി നട്ട്, ദിവസവും വിളക്കുവെയ്‌ക്കുകയും മൂന്ന് തവണ മന്ത്ര ജപത്തോടെ പ്രദക്ഷിണം വയ്‌ക്കുന്നത് നല്ലതാണ്. കൂടാതെ ചൊവ്വ, വെള്ളി, ഏകാദശി ദിവസങ്ങളിൽ തുളസി പൂവോ ഇലയോ പറിച്ചെടുക്കുവാനും പാടില്ല.
