ഹിന്ദുമത വിശ്വാസികൾക്കിടയിൽ അലൗകികതയുടെ പ്രതീകമാണ് കൂവളത്തില . പതിമൂന്ന് മീറ്ററോളം ഉയരം വെക്കുന്ന കുറ്റിച്ചെടിയോ ഇടത്തരം വലിപ്പം വയ്ക്കുന്ന മരമോ ആണ് കൂവളം . ഭാരതത്തിൽ ഉടനീളം കാണാൻ കഴിയുന്ന വൃക്ഷം കൂടിയാണിത്.
ശിവക്ഷേത്രങ്ങളിൽ ഒഴിച്ച് കൂടാനാവാത്ത വൃക്ഷമാണ് കൂവളം . കൂവളത്തില കൊണ്ട് ശിവഭഗവാനെ അർച്ചിക്കുന്നതും പൂജിക്കുന്നതും പുണ്യദായകമാണ് . മൂന്നിതളുകൾ ഉള്ള കൂവളത്തില ശിവ ഭഗവാന്റെ കയ്യിൽ ഇരിക്കുന്ന ത്രിശൂലത്തെയാണ് സൂചിപ്പിക്കുന്നത് എന്നും ,കൂടാതെ സൃഷ്ടി , സംരക്ഷണം , സംഹാരം എന്നിവയെയും സൂചിപ്പിക്കുന്നു എന്നും , ശിവഭഗവാന്റെ തൃക്കണ്ണാണ് എന്നും വിശ്വസിച്ചു പോരുന്നു .
കൂവളത്തിന്റെ ശാഖകളിൽ കട്ടിയുള്ള മുള്ളുകൾ കാണാം . പച്ചകലർന്ന മഞ്ഞ നിറവും സുഗന്ധവും ഉള്ള പുഷ്പങ്ങളാണ് കൂവളത്തിൽ ഉണ്ടാകുന്നത് . മാംസളവും വിത്തുകളും ഉള്ള ഫലമാണ് കൂവളത്തിന്റേത് . ഫലത്തിന് മധുരമുള്ളതിനാൽ ഇത് പക്ഷികളെയും അണ്ണാനെയുമൊക്കെ ആകർഷിക്കുന്ന ഒന്നാണ് . വിത്തുകൾ പാകിയോ , കമ്പ് മുറിച്ചു നട്ടോ ആണ് കൂവളം വെച്ച് പിടിപ്പിക്കുന്നത് . വീടിന്റെ തെക്ക് വശത്തോ പടിഞ്ഞാറ് വശത്തോ ആണ് കൂവളം നടാറുള്ളത് . പുണ്യവൃക്ഷമായി കരുതുന്നതിനാൽ സൂക്ഷ്മതയോടെ വേണം ഇവ വെക്കുന്നതും പരിപാലിക്കുന്നതും .
ഔഷധ ഗുണങ്ങൾ ഏറെയുള്ളതിനാൽ ആയുർവേദ ചികിത്സകൾക്കായി ഉപയോഗിക്കുന്ന ഒന്നാണ് കൂവളം . കൂവളത്തിന്റെ ഇലയും , തൊലിപ്പുറവും , ഫലവും , വിത്തുകളും ആയുർവേദ മരുന്നുകളിൽ ഉപയോഗിക്കുന്നു . ചരക സംഹിതയിൽ കൂവളത്തിന്റെ ഔഷധ ഗുണങ്ങൾ വർണ്ണിച്ചിട്ടുണ്ട് .
പ്രമേഹം , വാതം , കഫം , ഛർദ്ദി , ക്ഷയം , അതിസാരം എന്നിവയുടെ ചികിത്സക്കായി കൂവളം ഉപയോഗിച്ച് പോരുന്നു . കൂവളത്തിലയുടെ നീര് ചെവി വേദന , ചെവിയിൽ ഉണ്ടാകുന്ന പഴുപ്പ് എന്നിവക്ക് ഉത്തമ ഔഷധമാണ് . ദശമൂലാരിഷ്ടം , വില്വാദിലേഹ്യം എന്നിവയിൽ കൂവളം ചേർത്തിട്ടുണ്ട് .
