കേരളീയരുടെ ഏറ്റവും വലിയ ഉത്സവമായാണ് ഓണത്തെ കാണുന്നത്. ചിങ്ങം പിറന്നാല് പിന്നങ്ങോട്ട് ആഘോഷങ്ങള്ക്ക് അധികം സമയമില്ല. അത്തം മുതല് പത്തു ദിവസം മുറ്റം നിറഞ്ഞു നില്ക്കുന്ന പൂക്കളങ്ങള്, എങ്ങും ആര്പ്പുവിളികളും ആഘോഷങ്ങളും. ഏറ്റവും കൂടുതലായി ഓണാഘോഷം നിറഞ്ഞാടിയിരുന്നത് ക്യാമ്പസുകളിലാണ്. ഓണാവധിക്കു മുന്പുള്ള ദിവസം ഉത്സവമാണ് എല്ലാ ക്യാമ്പസുകളിലും. പൂക്കള മത്സരവും ഓണപ്പാട്ട്, വടംവലി, ചെണ്ടമേളം, പുലിക്കളി, തിരുവാതിര തുടങ്ങിയ ഓണക്കളികളും ഓണസദ്യയും ഓണത്തല്ലും ഉള്പ്പെടെ എല്ലാ പരിപാടികളും ക്യാമ്പസുകളില് സജീവമായിരിക്കും. ഇവിടെ ജാതിയുടേയോ മതത്തിന്റേയോ വ്യത്യാസമില്ലാതെ എല്ലാവരും ഒത്തൊരുമയോടെ ഒരുമിച്ച് ആഘോഷിക്കുന്നു.
കസവു സാരിയുടുത്ത് മുല്ലപ്പൂ ചൂടിയ പെണ്കുട്ടികളും മുണ്ടുടുത്ത് തലയില് കെട്ടും കെട്ടി എത്തുന്ന ആണ് കുട്ടികളും ഓണാഘോഷത്തെ ഒന്നുകൂടി വര്ണാഭമാക്കുന്നു. പൂക്കളമൊരുക്കന്നവരും, ഓണാഘോഷ പരിപാടികളുടെ നടത്തിപ്പിനായി തിരക്കു പിടിച്ച് ഓടി നടക്കുന്നവരും, ഓണ സദ്യയൊരുക്കുന്നവരും അതിനിടയില് ചുമ്മാ ചിരിച്ചു കളിച്ചു നടക്കുന്നവരും സെല്ഫിയെടുക്കുന്നവരും എന്നിങ്ങിനെയായി ക്യാമ്പസുകളില് വിദ്യാര്ത്ഥികള് നിറഞ്ഞു നില്ക്കുന്നു. ഒരുപോലെ ആഘോഷ തിമിര്പ്പിലായിരിക്കും എല്ലാവരും. എന്നാല് ഇത്തവണ ഓണാഘോഷങ്ങളൊന്നുമില്ല ക്യാമ്പസുകളെല്ലാം നിശബ്ദം.
ലോകത്ത് ആകമാനം പടര്ന്നു പിടിച്ച കോവിഡ് എന്ന മഹാമാരിയെ തുടര്ന്ന് വിദ്യാഭ്യാസ സ്ഥാപനങ്ങളെല്ലാം അടച്ചിട്ടിരിക്കുകയാണ്. വിദ്യാര്ത്ഥികളുടെ ആര്പ്പുവിളികളും ആരവങ്ങളുമില്ലാത്ത ഒരു ഓണക്കാലത്തെയാണ് ക്യാമ്പസുകള് ഈ വര്ഷം വരവേല്ക്കുന്നത്. കഴിഞ്ഞു പോയ കലാലയ ജീവിതത്തിലെ ഒരു ഓണാഘോഷമെങ്കിലും ഓര്ക്കാവരായി ആരാണുള്ളത് . എന്നാല് ഇത്തവണ ഓര്മിക്കാനായി ഒന്നുമില്ല. കഴിഞ്ഞ വര്ഷത്തെ ആഘോഷത്തിന്റെ ഓര്മ്മയില് നമുക്ക് ഈ വര്ഷത്തെ പറഞ്ഞയ്ക്കാം, അടുത്തവര്ഷം ഒത്തൊരുമിച്ച് വീണ്ടും ഓണം ആഘോഷിക്കാമെന്ന ശുഭ പ്രതീക്ഷയില്.
Comments