സന്യാസി ശ്രേഷ്ഠനായ പതഞ്ജലിയുടെ യോഗ സൂത്രങ്ങൾ സാധാരണ മനുഷ്യരിലേക്ക് എത്തിച്ചത് ബി കെ എസ് അയ്യങ്കാർ ആണ് . ഏകദേശം എൺപത്തിഅഞ്ച് വർഷത്തോളം യോഗ പഠിക്കുകയും , അഭ്യസിക്കുകയും ചെയ്തിരുന്ന ഇദ്ദേഹം ലോകത്തിലെ ഏറ്റവും മികച്ച യോഗ അധ്യാപകനായി അംഗീകരിക്കപ്പെട്ട വ്യക്തി കൂടിയാണ് .
കർണാടകയിലെ കോലാർ ജില്ലയിലുള്ള ബെല്ലൂർ എന്ന പ്രദേശത്തെ ഒരു ദരിദ്ര കുടുംബത്തിലാണ് അയ്യങ്കാർ ജനിച്ചത് . ബാല്യകാലങ്ങളിൽ നിരന്തരം പല വിധത്തിലുള്ള അസുഖങ്ങളാൽ വേട്ടയാടപ്പെട്ടിരുന്ന വ്യക്തിയായിരുന്നു അദ്ദേഹം . പതിനഞ്ചു വയസ്സുള്ളപ്പോൾ അദ്ദേഹത്തിന്റെ സഹോദര സ്ഥാനത്തുണ്ടായിരുന്ന ശ്രീ തിരുമലൈ കൃഷ്ണമാചാര്യൻ അദ്ദേഹത്തെ മൈസൂരിലേക്ക് വിളിപ്പിക്കുകയും , യോഗയുടെ വിവിധ പാഠങ്ങൾ പഠിപ്പിച്ചു കൊടുക്കുകയും ചെയ്തു . കുറച്ചു ദിവസത്തെ പരിശീലനം കൊണ്ട് തന്നെ അദ്ദേഹം തന്റെ ജീവിത ലക്ഷ്യം കണ്ടെത്തുകയും , പതിനെട്ടാമത്തെ വയസ്സിൽ യോഗയുടെ പ്രാധാന്യം ജനങ്ങളിലേക്ക് എത്തിക്കാനുള്ള ശ്രമത്തിന്റെ ഭാഗമായി പൂനെയിൽ എത്തി ചേരുകയും ചെയ്തു . തൊണ്ണൂറാമത്തെ വയസ്സിലും ദിനവും മൂന്ന് മണിക്കൂർ അദ്ദേഹം യോഗ ചെയ്തിരുന്നു .
ഇരുപതാം നൂറ്റാണ്ടിലെ ഏറ്റവും മികച്ച വയലിനിസ്റ്റ് ആയി കരുതപ്പെടുന്ന യെഹൂദി മെനുഹിൻ ആണ് അയ്യങ്കാറിനു അന്താരാഷ്ട്ര തലത്തിൽ പ്രസിദ്ധിയാർജ്ജിച്ചു കൊടുത്തത് . നിരവധി പ്രമുഖർക്ക് ഗുരുവായിരുന്നു അയ്യങ്കാർ . സച്ചിൻ ടെണ്ടുൽക്കർ , കരീന കപൂർ , മീര നായർ , ജയപ്രകാശ് നാരായൺ തുടങ്ങിയ പ്രമുഖർ ഈ ഗണത്തിൽ പെടുന്നു .
യോഗയെ കുറിച്ച് നിരവധി പുസ്തകങ്ങൾ അയ്യങ്കാർ രചിച്ചിട്ടുണ്ട് . പതിനേഴ് ഭാഷകളിലേക്ക് തർജ്ജമ ചെയ്യപ്പെടുകയും മൂന്ന് മില്യൺ കോപ്പികൾക്കടുത്തു വിറ്റു പോകുകയും ചെയ്ത “ലൈറ്റ് ഓൺ യോഗ ” ആണ് അദ്ദേഹം രചിച്ച ആദ്യത്തെ പുസ്തകം . അദ്ദേഹത്തിന്റെ മറ്റ് പ്രശസ്തമായ രചനകൾ ലൈറ്റ് ഓൺ പ്രാണായാമ , ലൈറ്റ് ഓൺ യോഗ സൂത്രാസ് ഓഫ് പതഞ്ജലി , ലൈറ്റ് ഓൺ ലൈഫ് എന്നിവയാണ് .
1991 ൽ പദ്മശ്രീയും , 2002 ൽ പദ്മഭൂഷണും , 2014 ൽ പദ്മവിഭൂഷണും നൽകി രാജ്യം അദ്ദേഹത്തെ ആദരിക്കുകയുണ്ടായി . 2014 ആഗസ്റ്റ് 20 ന് , തൊണ്ണൂറ്റി അഞ്ചു വയസ്സുള്ളപ്പോൾ പൂനെയിൽ വെച്ച് അദ്ദേഹം നിര്യാതനായി .
