ന്യൂഡല്ഹി: ദേശീയ തലത്തിലെ കായിക ബഹുമതികള് രാഷ്ട്രപതി ഇത്തവണ നല്കുന്നത് വെര്ച്വല് സംവിധാനത്തിലൂടെ. ആഗസ്റ്റ് മാസം 29-ാം തീയതിയാണ് ചടങ്ങ് നടക്കുക. കേന്ദ്ര കായികമന്ത്രാലയമാണ് തീരുമാനം അറിയിച്ചത്. രാഷ്ട്രപതി ഭവനിലെ സെന്റര് ഹാളില് നടന്നിരുന്ന പരിപാടിയാണ് കൊറോണ സുരക്ഷ പ്രമാണിച്ച് വിവിധ സംസ്ഥാനങ്ങളിലെ ദേശീയ കായിക അതോറിറ്റി കേന്ദ്രങ്ങളിലേയ്ക്ക് മാറ്റുന്നത്. അതാത് കേന്ദ്രത്തിലെ മേധാവിമാരുടെ നേതൃത്വത്തില് കായികതാരങ്ങളെ സ്വീകരിക്കുകയും ഡല്ഹിയിലെ ചടങ്ങില് എല്ലാവരും വീഡിയോ കോണ്ഫറന്സിലൂടെ പങ്കെടുക്കുമെന്നും മന്ത്രാലയം അറിയിച്ചു.
ദേശീയ കായിക ബഹുമതികള്ക്കായി ആകെ 76 പേരെയാണ് നാമനിര്ദ്ദേശം ചെയ്തിരി ക്കുന്നത്. കായികതാരങ്ങളെ രാഷ്ട്രപതി നേരിട്ട് അഭിസംബോധന ചെയ്യും. ദുരദര്ശന് കേന്ദ്രങ്ങള്ക്കാണ് എല്ലായിടത്തേയും പരിപാടിയുടെ സംപ്രേക്ഷണ ചുമതല നല്കി യിരിക്കുന്നത്. സാധാരണ നിലയില് രാഷ്ട്രപതി ഭവനില് 400 മുതല് 500 വരെയാണ് അതിഥികളെ ക്ഷണിക്കാറുള്ളത്.രാജ്യത്താകമാനമുള്ള 16 വേദികളാണ് ആഗസ്റ്റ് 29 ന് സജ്ജമാവുക. കായികതാരങ്ങള്ക്ക് നല്കുന്ന പ്രത്യേക ബ്ലേസറുകളുടെ അളവ് കായികമന്ത്രാലയം വാങ്ങിയിട്ടുണ്ട്. എല്ലാവര്ക്കുമുള്ള ബഹുമതി പത്രവും ഫലകവും ബ്ലേസറുകളും അതാത് കായിക കേന്ദ്രങ്ങളില് വരുന്നയാഴ്ച കൊറിയറില് എത്തിച്ചു നല്കുമെന്ന് മന്ത്രാലയം അറിയിച്ചു.
