ആളുകളില്‍ കൂടുതലായി കണ്ടുവരുന്ന ഒരു അസുഖമാണ് കരള്‍വീക്കം. ശരീരത്തിലെ രക്തത്തില്‍ അടങ്ങിയിട്ടുളള കൊഴുപ്പിന്റെ അളവ് കൂടുമ്പോള്‍ കൊഴുപ്പിനെ ഇല്ലാതാക്കാനുള്ള കരളിന്റെ ശേഷി കുറയുന്നു. ഈ അവസ്ഥയാണ് കരള്‍വീക്കം. പ്രമേഹം, അമിതവണ്ണം, കൊളസ്‌ട്രോള്‍ തുടങ്ങിയവയെല്ലാം തന്നെ കരള്‍ വീക്കത്തിന് കാരണമാകുന്നവയാണ്. രണ്ടു തരത്തിലുള്ള കരള്‍വീക്കമാണ് പൊതുവായി കണ്ടുവരുന്നത്. അതില്‍ ഒന്നാമത്തേതാണ് മദ്യപാനികള്‍ക്ക് ഉണ്ടാകുന്ന കരള്‍വീക്കമാണ്. സ്ഥിരമായി മദ്യം കുടിക്കുന്നവരിലാണ് കൂടുതലായി കരള്‍ രോഗങ്ങള്‍ കണ്ടുവരുന്നത്. മദ്യത്തിന്റെ ഉപയോഗം പൂര്‍ണമായും ഒഴിവാക്കുന്നതിലൂടെ അല്ലാതെ ഈ രോഗത്തെ തടയാനാവില്ല.
ക്രമമല്ലാത്ത ജീവിതശൈലിയാണ് രണ്ടാമത്തേത്. അനിയന്ത്രിതമായ പ്രമേഹം, അമിതവണ്ണം, ഉയര്‍ന്ന കൊളസ്‌ട്രോള്‍ എന്നിവയെല്ലാം തന്നെ കരള്‍ വീക്കത്തിനു കാരണമാകുന്നു. ഹെപ്പറ്റൈറ്റിസ്, വില്‍സന്‍സ് ഡിസീസ് തുടങ്ങിയവയും അപൂര്‍വ കരള്‍ രോഗങ്ങളുടെ ലക്ഷണമാണ് . പ്രധാനമായി ലക്ഷണങ്ങള്‍ ഒന്നും തന്നെ കാണിക്കാത്തതിനാല്‍ കരള്‍വീക്കം എന്ന രോഗത്തെ പെട്ടെന്ന് തിരിച്ചറിയാനാവില്ല. രോഗം മൂര്‍ച്ഛിച്ച് സമയങ്ങളിലാണ് അടിവയറ്റില്‍ വേദന, തലചുറ്റല്‍, ക്ഷീണം, അസ്വസ്ഥത, ഭാരക്കുറവ് എന്നീ ലക്ഷണങ്ങള്‍ കണ്ടു തുടങ്ങുന്നത്. അള്‍ട്രാസൗണ്ട് സ്‌കാനിങ്ങിലൂടെയാണ് കരള്‍വീക്കം ആദ്യം കണ്ടെത്തുന്നത്.
പിന്നീട് ഇതിന്റെ തീവ്രത കൂടുതലായി മനസ്സിലാക്കാന്‍ രക്തപരിശോധന നടത്തുന്നു. കരള്‍വീക്കം അപകടകാരിയായ ഒരു അസുഖമല്ല. പക്ഷേ വേണ്ടസമയത്ത് ആവശ്യമായ ചികിത്സ നടത്തിയില്ലെങ്കില്‍ ഇത് മറ്റുള്ള കരള്‍ രോഗങ്ങള്‍ക്ക് വഴിയൊരുക്കുന്നു. കരള്‍ സിറോസിസ് പോലുള്ള രോഗങ്ങള്‍ കരളിനെ ബാധിച്ചു കഴിഞ്ഞ പിന്നെ ഒരിക്കലും പൂര്‍ണമായും ചികിത്സിച്ചു മാറ്റാന്‍ സാധിക്കുകയില്ല. കരള്‍വീക്കം കണ്ടെത്തി കഴിഞ്ഞാല്‍ ഉടന്‍ തന്നെ ഡോക്ടറുടെ നിര്‍ദ്ദേശത്തിന് അനുസരിച്ചുള്ള ജീവിതശൈലി പിന്‍തുടരുക. അതിലൂടെ ആരോഗ്യം വീണ്ടെടുക്കുക.
