ജനീവ: ആഗോള തലത്തിലെ കൊറോണ വ്യാപനം 2.38കോടി കവിഞ്ഞു. ഏറ്റവും പുതിയ റിപ്പോര്ട്ടനുസരിച്ച് 2,38,811,693 പേര്ക്കാണ് ഇതുവരെ കൊറോണ ബാധിച്ചിരിക്കുന്നത്. എന്നാല് രോഗമുക്തിനേടുന്നവരുടെ എണ്ണവും അതുപോലെ മെച്ചപ്പെടുന്നതായി ലോകാരോഗ്യ സംഘടന റിപ്പോര്ട്ടില് സൂചിപ്പിക്കുന്നു. നിലവില് 1,63,360,536 പേരാണ് രോഗമുക്തി നേടിയത്. മരണസംഖ്യ 8 ലക്ഷത്തിനപ്പുറമായതായാണ് വിവരം. ഇന്നലെ വരെ 8,17,005 പേരാണ് മരണത്തിന് കീഴടങ്ങിയത്. ഇറ്റലിയില് രോഗബാധ കുറയുന്നതായാണ് സൂചന. ഒരാഴ്ചയായി 5000 പേര്ക്കുമാത്രമാണ് രോഗം പുതുതായി ഉണ്ടായിരിക്കുന്നത്. ഇന്നലെവരെ ആകെ 2,60,298 പേര്ക്കാണ് രോഗം ബാധിച്ചത്. ഇതില് മരണം 35,441ല് പിടിച്ചു നിര്ത്താനുമായി. ബ്രിട്ടണില് മരണനിരക്ക് കുറയുകയാണ് 41000ല് നിന്ന് 433 പേര് മാത്രമാണ് ഒരാഴ്ചയ്ക്കിടെ മരണത്തിന് കീഴടങ്ങിയത്.
രോഗബാധയില് പതിവുപോലെ അമേരിക്കയാണ് മുന്നില് 59,15,630 പേര്ക്കാണ് ആകെ രോഗബാധ. മരണസംഖ്യ 1,81,114 ആണ്. ബ്രസീലില് രോഗബാധിതര് 36,27,217 എത്തി. മരണസംഖ്യ 1,15,451 ആയിരിക്കുകയാണ്. റഷ്യയില് മരണ നിരക്ക് 16,448 ആയി.മെക്സിക്കോയില് മരണനിരക്ക് 60,800 ആയത് ആശങ്കയുണര്ത്തുകയാണ്.
