കിഗ്സ്റ്റണ്: ജമൈക്കയുടെ സ്പ്രിന്റ് ഇതിഹാസ താരം ഉസൈന് ബോള്ട്ടിന് കൊറോണ സ്ഥിരീകരിച്ചു. തന്റെ 34-ാം പിറന്നാള് ആഘോഷത്തിന് തൊട്ടുപിന്നാലെയാണ് ബോള്ട്ടിന് രോഗം സ്ഥിരീകരിച്ചത്. ബോള്ട്ട് ട്വിറ്ററിലൂടയാണ് ഇക്കാര്യം അറിയിച്ചത്.
ബോള്ട്ടിന്റെ പിറന്നാള് ആഘോഷത്തില് വെസ്റ്റ് ഇന്ഡീസ് ക്രിക്കറ്റ് താരം ക്രിസ് ഗെയ്ല് ഉള്പ്പെടെയുള്ള കായിക താരങ്ങള് പങ്കെടുത്തതായാണ് റിപ്പോര്ട്ട്. മാഞ്ചസ്റ്റര് സിറ്റി ഫുട്ബോള് താരം റഹീം സ്റ്റെര്ലിംഗും ആഘോഷത്തില് പങ്കെടുത്തതായാണ് വിവരം. ശനിയാഴ്ചയാണ് ബോള്ട്ടിന് കൊറോണ പരിശോധന നടത്തിയത്. രോഗം സ്ഥിരീകരിച്ചതിനു പിന്നാലെ ഐസൊലേഷനില് പോവുകയാണെന്നും സുഹൃത്തുക്കളില് നിന്നു വിട്ടു നില്ക്കുകയാണെന്നും ബോള്ട്ട് അറിയിച്ചു. ആഗസ്റ്റ് 21നായിരുന്നു ബോള്ട്ടിന്റെ പിറന്നാള് ആഘോഷം നടന്നത്.
അത്ലറ്റിക്സിലെ വേഗരാജാവ് എന്നറിയപ്പെടുന്ന ബോള്ട്ട് ഒളിംപിക്സില് 8 തവണ സ്വര്ണം നേടിയിട്ടുണ്ട്. 100, 200 മീറ്റര് ഓട്ടത്തില് ലോക റെക്കോര്ഡും ബോള്ട്ടിന്റെ പേരിലാണ്. 100 മീറ്ററില് 9.58 സെക്കന്ഡിലും 200 മീറ്ററില് 19.19 സെക്കന്ഡിലുമാണ് ബോള്ട്ട് ഫിനിഷ് ചെയ്തത്.
