ഓണാഘോഷം എന്നു പറയുമ്പോള് ഓരോ മലയാളിയുടേയും മനസ്സിലേക്ക് ഓടി വരുന്നത്ത് പൂക്കളവും ഓണസദ്യയും ഓണക്കോടിയും തന്നെയാണ്. അതില് ഏറ്റവും ആവേശത്തോടെ നാം കാത്തിരിക്കുന്നത് ഓണക്കോടിയ്ക്കായാണ്. തിരുവോണ ദിവസം ഓണക്കോടിയും ഉടുത്തു കൂട്ടുകാരോടൊപ്പം കറങ്ങി നടക്കുന്നതിന്റെ സുഖം ഒന്ന് വേറെ തന്നെയാണ്. വിവിധ തരത്തിലുള്ള പുതിയ മോഡലുകള് വിപണിയില് സജീവമായി മാറിയിട്ടുണ്ടെങ്കിലും ഓണമെന്ന് കേള്ക്കുമ്പോള് ഏതൊരു ആളുടെയും മനസ്സില് കസവു സാരിയും മുണ്ടും എല്ലാം തന്നെയാണ് ആദ്യം ഓടി വരിക.
കാലം എത്ര മാറിയാലും വേഷത്തില് പല തരത്തിലുളള പരിഷ്കാരങ്ങള് വന്നെത്തിയാലും കേരളത്തിലെ സ്ത്രീകളും പുരുഷന്മാരും തിരുവോണ ദിവസം കൂടുതലായി കസവു സാരിയും മുണ്ടുമാണ് ധരിക്കാറുളളത്. ഇത് തിരുവോണത്തിന്റെ മാറ്റു കൂട്ടുന്നു. അതുകൊണ്ടു തന്നെ ഓണക്കാലം എന്നു പറയുമ്പോള് കസവു സാരികളുടെ പ്രതാപകാലം കൂടിയാണ്. വിവിധ തരത്തിലുള്ള സാരികളാണ് ഓണത്തിന് വിപണിയില് എത്തുന്നത്. വര്ക്കുകള് ഉള്ളതും ഇല്ലാത്തതും പല തരത്തിലുളള ചിത്രങ്ങള് ഉളളതുമായ വിവിധ തരത്തിലുള്ള സാരികള് ഇന്ന് വിപണിയില് ലഭ്യമാണ്.
സെറ്റ് സാരികളുടെ മാറ്റ് കൂട്ടുന്നത് അവയുടെ കസവുള്ള മുന്താണി തന്നെയാണ്. ഏറ്റവും കൂടുതല് ഡിസൈനുകള് മുന്താണിയിലാണ് ഉണ്ടായിരിക്കുക. മയില്പീലി, ഓടക്കുഴല്, ആലില, കൃഷ്ണ ഭഗവാന്റെ ചിത്രങ്ങള് തുടങ്ങി സ്ത്രീകള് ഏറെ ഇഷ്ടപ്പെടുന്ന വ്യത്യസ്തമായ ഒരുപാട് കേരള സാരികള് വിപണി കീഴടക്കിയിട്ടുണ്ട്. ഒരു കേരളീയ വസ്ത്രം കൂടിയാണ് സെറ്റ് സാരി. സെറ്റ് സാരി ഉടുക്കുമ്പോള് പെണ്കുട്ടികള്ക്ക് ഒരു മലയാളിത്തം കടന്നു വരുന്നു എന്നത് പ്രത്യേകം പറയേണ്ട കാര്യമില്ല. ഓണഘോഷ പരിപാടികളില് എല്ലാം തന്നെ കൂടുതലായും കസവു സാരി തന്നെയാണ് എല്ലാവരും ധരിക്കാറുളളത്.
