യാത്രകൾ ഇഷ്ടപ്പെടുന്നവർ പോകാൻ മറക്കാത്ത ഭാരതത്തിലെ ഒരു സ്ഥലമാണ് രാജസ്ഥാനിലെ പിങ്ക് സിറ്റി എന്നറിയപ്പെടുന്ന ജയ്പൂർ . യുനെസ്കോയുടെ ലോക പൈതൃക പ്രദേശങ്ങളിൽ ഉൾപ്പെട്ടിട്ടുള്ള ജയ്പൂർ മനോഹരമായ മന്ദിരങ്ങളും സ്മാരകങ്ങളും കൊണ്ട് വിനോദസഞ്ചാരികളെ ഏറ്റവും കൂടുതൽ ആകർഷിക്കുന്ന ഒന്നാണ് . ഇത്തരത്തിൽ ജയ്പ്പൂരിലുള്ള ഒരത്ഭുതമാണ് ജലത്തിനടിയിൽ നിലകൊള്ളുന്ന കൊട്ടാരമായ ജൽ മഹൽ .
മാൻ സാഗർ തടാകത്തിന് നടുവിൽ ഭാരത സംസ്കാരത്തിന്റെ ഭാഗമായ വാസ്തുവിദ്യ ഉപയോഗിച്ചും ചിത്രരചന ഉപയോഗിച്ചും നൂറ്റാണ്ടുകൾക്ക് മുൻപ് രൂപകൽപന ചെയ്തു നിർമ്മിച്ചിട്ടുള്ള മനോഹര മന്ദിരമാണ് ജൽ മഹൽ . അഞ്ചു നിലകൾ ഉള്ള കൊട്ടാരത്തിന്റെ ഒരു നില മാത്രമാണ് ജലത്തിന് മുകളിൽ കാണാൻ സാധിക്കുക . ജലത്തിന് മുകളിൽ കാണുന്ന കൊട്ടാരത്തിന്റെ നിഴൽ തടാകത്തിൽ പ്രതിഫലിക്കുന്നത് തന്നെ മനോഹരമായ ഒരു ദൃശ്യമാണ് സന്ദർശകർക്ക് സമ്മാനിക്കുന്നത് .
ജൽ മഹൽ കൊട്ടാരത്തിന്റെ മുകൾ നില പോലെ തന്നെ വാസ്തുവിദ്യ കൊണ്ട് വിസ്മയം തീർത്തിരിക്കുന്നതാണ് ജലത്തിനടിയിൽ മറഞ്ഞു കിടക്കുന്ന ബാക്കി നാല് നിലകളും . പണ്ട് കാലങ്ങളിൽ രാജാക്കന്മാർക്ക് ഉല്ലാസ വേളകളിൽ വേട്ടയാടാൻ വേണ്ടി ചുവന്ന മണൽകല്ലു കൊണ്ട് നിർമ്മിച്ചതാണീ കൊട്ടാരം . കൊട്ടാരം പണിയുന്ന നാളുകളിൽ എത്ര കഠിനമായ മഴ പെയ്താലും വെള്ളം പൊങ്ങുന്ന സ്ഥലമായിരുന്നില്ല ഇത് .
പതിനെട്ടാം നൂറ്റാണ്ടിൽ ജയ്പൂരിലെ ചരിത്രപ്രദേശമായ ആംബറിലെ രാജാവ് വെള്ള പൊക്കം ഉണ്ടാവാതിരിക്കാൻ വേണ്ടി രണ്ടു കുന്നുകൾക്കിടയിൽ അണകെട്ട് നിർമ്മിക്കുകയും തന്മൂലം കൊട്ടാരം ജലത്തിനടിയിൽ ആവുകയും ചെയ്തു . ജൽ മഹൽ കാണാനെത്തുന്നവർക്ക് കരകൗശല വിദ്യ കൊണ്ട് മനോഹരമാക്കിയ തടി കൊണ്ടുള്ള ബോട്ടുകളിൽ അവിടെയെത്തി കൊട്ടാരത്തിന്റെ ഭംഗി ആസ്വദിക്കാവുന്നതാണ് .
അന്നുണ്ടായിരുന്ന ചിത്രകാരന്മാർ തങ്ങളുടെ കൈകൾ കൊണ്ട് കൊട്ടാരത്തിന്റെ ഓരോ മുക്കിലും മൂലയിലും തീർത്ത മനോഹരമായ ചിത്രരചനകൾ ഇന്നും യാതൊരു കേടുപാടുകളും സംഭവിക്കാതെ സംരക്ഷിച്ചു പോരുന്നു . ഏറ്റവും നല്ല രീതിയിൽ സംരക്ഷിച്ചു പോരുന്ന ഭാരതത്തിന്റെ സൃഷ്ടികളിൽ ഏറ്റവും മികച്ച ഉദാഹരണമായിരിക്കും ജൽ മഹൽ .
ജൽ മഹലിലേക്കുള്ള വഴിയിൽ വെച്ച് തന്നെ കൊട്ടാരത്തിന്റെ മനോഹാരിത നമ്മെ അതിശയപ്പെടുത്തും . ജൽ മഹൽ സ്ഥിതി ചെയ്യുന്ന തടാകത്തിന് സമീപപ്രദേശത്തായി ധാരാളം വന്യമൃഗങ്ങൾ പാർക്കുന്ന വനമേഖലയുണ്ട് . ഇപ്പോൾ കൊട്ടാരം സംരക്ഷിച്ചു പോരുന്ന അധികൃതർ , ചുവരുകളിൽ ലൈറ്റുകൾ പിടിപ്പിച്ചതിനാൽ രാത്രികാലങ്ങളിൽ അതിമനോഹരിയായിട്ടാണ് ജൽ മഹൽ കാണപ്പെടുന്നത് . രാജ്പുത് കലാകാരന്മാരുടെ വർണ്ണിക്കാൻ കഴിയാത്ത കഴിവുകളുടെ വിസ്മയം ആണ് ഇന്നും അത്യധികം മനോഹരിയായി നിലനിൽക്കുന്ന ജൽ മഹൽ .
Comments