മുംബൈ : ജര്മന് ആഡംബര കാര് നിര്മാതാവായ ഔഡിയുടെ ഏറ്റവും സ്പോര്ടി ക്യു മോഡലായ ആര്എസ് ക്യു8 ഇന്ത്യൻ വിപണിയിലെത്തി. രണ്ടാഴ്ച മുമ്പ് ബുക്കിംഗ് ആരംഭിച്ച മോഡലിന് മികച്ച പ്രതികരണമാണ് ലഭിച്ചിരുന്നത്. ആര്എസ് മോഡലിന്റെ കരുത്തും കൂപ്പെ മോഡലിന്റെ മനോഹാരിതയും എസ് യുവിയുടെ പ്രവര്ത്തനമികവും ഒത്തുചേരുന്നതാണ് പുതിയ മോഡല്.
600 എച്ച്പിയും 800 എന്എംഉം ശക്തിയുള്ള തട്ടുപൊളിപ്പന് ട്വിന്-ടര്ബോ വി8 എന്ജിനാണ് ആര്എസ് ക്യു8-ന്റെ പിന്ബലം. നിന്ന നില്പ്പില് നിന്ന് നാലു സെക്കന്ഡിനുള്ളില് 100 കിമി വേഗം കൈവരിക്കാവുന്ന ശക്തിയാണിത്. ലോകമെങ്ങും റെക്കോഡുകള് തകര്ത്ത ഔഡി ആര്എസ് ക്യു8നെ ഇന്ത്യയിലെത്തിക്കുന്നതില് ഏറെ അഭിമാനമുണ്ടെന്ന് ഔഡി ഇന്ത്യ തലവന് ബല്ബീര് സിംഗ് ധില്ലന് പറഞ്ഞു. രാജ്യത്തെ ലക്ഷ്വറി കാര് പ്രിയര്ക്കിടയില് ഈ മോഡല് വന്തരംഗം സൃഷ്ടിക്കുമെന്നാണ് വിശ്വാസമെന്നും അദ്ദേഹം പറഞ്ഞു.
ആവശ്യാനുസരണം ഡ്രൈവിംഗ് ചലനങ്ങള് ക്രമപ്പെടുത്താവുന്ന ഡ്രൈവ് സെലക്ട് ഡൈനാമിക് ഹാന്ഡ്ലിംഗ് സിസ്റ്റം, ഇന്ധനം ലാഭിയ്ക്കുന്നതിനായി സിലിണ്ടറുകള് ഓഫ് ചെയ്യുന്ന സിലിണ്ടര് ഓണ് ഡിമാന്ഡ്, എല്ലാ വീലുകളിലേയ്ക്കും പവറെത്തിക്കുന്ന 8-സ്പീഡ് ടിപ്ടോണിക് ഗിയര്ബോക്സ്, ആര്എസ് റൂഫ് സ്പോയില്, ഔഡിയുടെ വിഷ്വല് കോക്പിറ്റ്, സ്പോര്ട്-അഡാപ്റ്റീവ് എയര് സസ്പെന്ഷന് തുടങ്ങിയവയാണ് ഔഡി ആര്എസ് ക്യു8ന്റെ പ്രധാന സവിശേഷതകള്. ഇതോടെ ഈ മോഡലിന് തൊട്ടുമുമ്പ് വിപണിയിലെത്തിയ ഔഡി ആര്7ഉമായിച്ചേര്ന്ന് ഔഡിയുടെ മുന്നിര സ്പോര്ട് വ്യൂഹം മികവുറ്റതാക്കുകയാണ് ആര്എസ് ക്യ8 എന്നും ബല്ബീര് സിംഗ് ധില്ലന് പറഞ്ഞു.
2.07 കോടി രൂപ മുതലാണ് വാഹനത്തിന്റെ വില.
