ആകാശത്തോളം ഉയർന്നുനിൽക്കുന്ന ഹവാ മഹലിനെ അറിയാമോ ? കാറ്റിന്റെ മർമ്മരം പോലും കാതിൽ പതിക്കും. ജയ്‌പൂരിലെ നഗരമധ്യത്തിലാണ് ആരും പോവാൻ കൊതിക്കുന്ന ഹവാ മഹൽ സ്ഥിതി ചെയ്യുന്നത്. ഇരുന്നൂറ്റി ഇരുപതോളം വർഷത്തെ പഴക്കമുള്ള ഈ മഹലിന്റെ പ്രത്യേകതകൾ അറിയാം.
മഹാരാജ സവായ്‌ പ്രതാപ് സിങ് ആണ് 1799ൽ ഹവാ മഹൽ പണി കഴിപ്പിച്ചത്. രജപുത്ര രാജാക്കന്മാരുടെ കൊട്ടാരത്തിലെ സ്ത്രീകളുടെ അന്തപുരത്തിന്റെ ഭാഗമായി നിർമ്മിച്ച ഈ മഹൽ സഞ്ചാരികളുടെയും ചരിത്രകാരന്മാരുടെയും ഇഷ്ടയിടം കൂടിയാണ്. അന്നത്തെ കാലത്ത് സ്ത്രീകൾ പുറത്തിറങ്ങുന്നത് വിരളമായിരുന്നു. അതിനാൽ നഗരത്തിൽ എന്ത് നടക്കുന്നു എന്നറിയാനുള്ള അവരുടെ ഏക സഹായം ഹവാ മഹലിലെ ജനാലകൾ ആയിരുന്നു. മഹാരാജ സവായ്‌ പ്രതാപ് സിംഗിന്റെ നിർദ്ദേശപ്രകാരം ലാൽ ചന്ദ് ഉസ്ത എന്നയാളാണ് മുഗൾ, രജ്പുത് നിർമ്മിതികളുടെ സങ്കലനമായ ഈ മഹൽ നിർമ്മിക്കുന്നത്. കൂടാതെ ശ്രീകൃഷ്ണ ഭക്തനായിരുന്ന മഹാരാജ സവായ്‌ പ്രതാപ് സിംഗിന്റെ നിർദ്ദേശമനുസരിച്ച് ശ്രീകൃഷ്ണന്റെ കിരീടത്തിന് ആകൃതിയിലാണ് മഹൽ പണിതിരിക്കുന്നത്.
മഹൽ എന്നുപറയുമ്പോൾ വലിയൊരു കൊട്ടാരമാണ് മനസിൽ വരുന്നതെങ്കിലും ഒരു മുഖപ്പായാണ് ഇത് നിർമ്മിച്ചിരിക്കുന്നത്. ഈ കാണുന്ന മുൻ ഭാഗം മാത്രമാണ് ഹവാ മഹൽ, ഇതിന്റെ പിന്നിലേക്ക് നിർമ്മിതികളില്ല.
953 ജനാലകൾ ആണ് ഇതിലുള്ളത്. അതും തേനീച്ച കൂട് പോലെ. ഇവയെ ജരോഖകൾ എന്നാണ് പറയുന്നത്. നിരവധി കൊത്തുപണികൾ കാണാൻ സാധിക്കും. കൂടാതെ മഹലിനുള്ളിൽ എപ്പോഴും തണുപ്പ് ആയിരിക്കും എന്നത് മറ്റൊരു പ്രത്യേകത ആണ്.
പുറംമോടി ആസ്വദിച്ചുകഴിയുമ്പോൾ ഇതിനേക്കാൾ മനോഹരമാണ് ഉള്ളിൽ എന്ന് വിചാരിച്ചാൽ ശരിയാവില്ല. ഹവാ മഹലിന്റെ പുറംമോടി തന്നെയാണ് എടുത്തുപറയേണ്ടത്. ഉള്ളിൽ കടന്നാൽ നടുമുറ്റവും മുറികളും മാത്രമാണ് കൂടുതലായി കാണാൻ ഉള്ളത്. പുറകിലായാണ് അകത്തേക്ക് കടക്കാനുള്ള പ്രവേശന കവാടം. നടുമുറ്റം ശരത് മന്ദിർ എന്ന പേരിലാണ് അറിയപ്പെടുന്നത്. ഓരോ നിലകളുടെയും പേര് രത്തൻ മന്ദിർ, വിചിത്ര മന്ദിർ, പ്രകാശ് മന്ദിർ, ഹവാ മന്ദിർ എന്നിങ്ങനെയാണ്.
