ഭാരതത്തിലെ കന്യാകുമാരിയിലെ വാവതുറൈ എന്ന പ്രദേശത്താണ് ഭൂമിശാസ്ത്രപരമായി അത്ഭുതങ്ങൾ നിറഞ്ഞ വിവേകാനന്ദപ്പാറ സ്ഥിതി ചെയ്യുന്നത് . എല്ലാ വർഷവും ലക്ഷകണക്കിന് വിനോദസഞ്ചാരികൾ എത്തുന്ന ഒരു വിനോദ സഞ്ചാര പ്രദേശം കൂടിയാണിത് .
ബംഗാൾ ഉൾക്കടൽ , അറേബ്യൻ സമുദ്രം , ഇന്ത്യൻ മഹാസമുദ്രം എന്നിവയുടെ സംഗമസ്ഥാനം കൂടിയായ ഈ സ്ഥലത്തിന്റെ ഭംഗി ആസ്വദിക്കാനും കൂടാതെ വിവേകാനന്ദ സ്വാമിക്ക് ജ്ഞാനോദയം സിദ്ധിച്ചത് , ഈ സമുദ്രങ്ങളുടെ സംഗമസ്ഥലത്തുള്ള പാറയിൽ ഇരുന്നപ്പോഴാണ് എന്നുള്ള കാര്യം കൊണ്ട് കൂടിയാണ് ഓരോ വർഷവും ഇത്രയധികം വിനോദസഞ്ചാരികൾ ഇവിടം സന്ദർശിക്കാൻ എത്തി ചേരുന്നത് .
നൂറ്റിഅറുപതു ദശലക്ഷം വർഷങ്ങൾക്ക് മുൻപ് വൻഭൂഖണ്ഡമായിരുന്ന ഗോണ്ട്വാനലാൻഡ് ഭാരതം , ഓസ്ട്രേലിയ , അന്റാർട്ടിക്ക എന്ന ഭൂഖണ്ഡങ്ങളായി വേർപിരിഞ്ഞത് വിവേകാനന്ദ പാറയിരിക്കുന്ന സംഗമസ്ഥാനത്ത് വെച്ചായിരുന്നു എന്നാണ് ചരിത്ര രേഖകൾ പറയുന്നത് . ഇന്ത്യൻ എഴുത്തുകാരനായ പ്രണയ് ലാലിന്റെ പുസ്തകമായ “ഇൻഡിക്ക “യിൽ അദ്ദേഹം ഈ പ്രക്രിയ എങ്ങിനെ സംഭവിച്ചു എന്ന് സംക്ഷിപ്തമായി വിശദീകരിക്കുകയും കൂട്ടത്തിൽ ഇങ്ങിനെ ഒരു വാചകം എഴുതി ചേർക്കുകയും ചെയ്തിരിക്കുന്നു ” ഭൗമശാസ്ത്രജ്ഞർ വിവേകാനന്ദ റോക്ക് മെമ്മോറിയലിനെ ഗോണ്ട്വാന ജംഗ്ഷൻ എന്ന് വിളിക്കുന്നതിന് കാരണം ഒരിക്കൽ ഇന്ത്യ , മഡഗാസ്കർ ശ്രീലങ്ക, കിഴക്കൻ അന്റാർട്ടിക്ക, ഓസ്ട്രേലിയ എന്നിവ ചേർന്ന് കിടന്നിരുന്നു എന്നുള്ളതിന്റെ സൂചനകൾ ഇവിടെ നിന്ന് ലഭ്യമാണ് എന്നുള്ളത് കൊണ്ടാണ് “.
1962 ൽ സ്വാമി വിവേകാനന്ദന്റെ നൂറാം ജന്മവാർഷികത്തിൽ , ഒരു കൂട്ടം ആളുകൾ കന്യാകുമാരി എന്ന കമ്മിറ്റി രൂപീകരിക്കുകയും , പാറക്ക് മുകളിലായി ഒരു സ്മാരകവും , കരയിൽ നിന്ന് അവിടേക്കു ഒരു പാലവും നിർമ്മിക്കാൻ തീരുമാനം എടുക്കുകയും ചെയ്തു . ഇതേ അവസരത്തിൽ തന്നെ ചെന്നൈയിൽ ഉള്ള രാമകൃഷ്ണ മിഷനും ഇങ്ങിനെ ഒരു പദ്ധതി തയ്യാറാക്കുക ഉണ്ടായി .
എന്നാൽ ഹിന്ദുക്കളും ക്രിസ്ത്യാനികളും തമ്മിലുള്ള തർക്കത്തിനൊടുവിൽ , സ്മാരകം പണിയുന്നത് കോടതി തടയുകയും , അത് വിവേകാനന്ദപ്പാറയാണ് എന്നതിനുള്ള ഒരു രേഖ സ്ഥാപിക്കാൻ ഉത്തരവിടുകയും ചെയ്തു . 1964 മുതൽ ഒൻപതു വർഷത്തെ പോരാട്ടത്തിനൊടുവിലാണ് വിവേകാനന്ദ കേന്ദ്രം എന്ന സ്വപ്നം സാക്ഷാത്കരിക്കപ്പെട്ടത് . സ്വാമി വിവേകാനന്ദന്റെ നൂറ്റി എട്ടാമത്തെ ജന്മദിന വാർഷികത്തോടനുബന്ധിച്ചാണ് ഔദ്യോഗികമായി വിവേകാനന്ദ കേന്ദ്രം സ്ഥാപിതമായത് . അന്നത്തെ ദിവസം സന്യാസികൾ അല്ലാത്ത ഒരു കൂട്ടം ജനങ്ങളുടെ പരിശ്രമത്തിന്റെ ഫലമായി ഉയർന്ന സ്മാരകത്തിന് മുകളിൽ “ഓം ” എന്നെഴുതിയ കുങ്കുമ നിറത്തിലുള്ള പതാക ഉയർത്തുകയുണ്ടായി .
ഐക്യത്തിന്റെയും വിശുദ്ധിയുടെയും സംഗമമായ കന്യാകുമാരിയിൽ , ഭാരത്തിന്റെ ഐക്യ അഭിലാഷത്തിന്റെ മറ്റൊരു പ്രതീകമാണ് വിവേകാനന്ദപ്പാറ മെമ്മോറിയൽ .രാജ്യത്തിന്റെ സന്തോഷകരവും ആകർഷണീയവുമായ എല്ലാ വാസ്തുവിദ്യ സൗന്ദര്യങ്ങളുടെ സംഗമം കൂടിയാണ് ഈ സ്മാരകം .
ഭാരതത്തിലെ ഐക്യം ആഗ്രഹിക്കുന്ന ഓരോ വ്യക്തികളുടെയും സ്വപ്ന സാക്ഷാത്കാരം കൂടിയാണ് ഈ സ്മാരകം .
