വാഹന വിപണിയെ തകിടം മറിച്ച് രംഗത്തെത്തിയ സ്പോർട് യൂട്ടിലിറ്റി വാഹന(എസ്യുവി)മായ ടി–റോക്കിനായുള്ള ബുക്കിങ് നിർമാതാക്കളായ ഫോക്സ്വാഗൻ താൽക്കാലികമായി നിർത്തി. ഞെട്ടാൻ വരട്ടെ…കമ്പനി നിർമ്മിച്ച ആദ്യ ബാച്ച് പൂർണമായും വിറ്റഴിഞ്ഞതിനാലാണ് പുതിയ ബുക്കിങ് സ്വീകരിക്കുന്നത് ഫോക്സ്വാഗൻ നിർത്തിയിരിക്കുന്നത്.
കോംപാക്ട് എസ്യുവി മോഡലായ ടി-റോക്കിനെ കഴിഞ്ഞ ഓട്ടോ എക്സ്പോയിൽ അനാവരണം ചെയ്തതിനു പിന്നാലെ മാർച്ചിലാണ് ഇന്ത്യൻ വിൽപനയ്ക്കെത്തിച്ചത്. വിദേശത്തു നിർമ്മിച്ചു സിബിയു വ്യവസ്ഥയിൽ ഇറക്കുമതി ചെയ്യുന്ന ടി–റോക്കിന് 19.99 ലക്ഷം രൂപയായിരുന്നു ഷോറൂം വില. തുടക്കമെന്ന നിലയിൽ 2,500 എസ്യുവി ഇറക്കുമതി ചെയ്തായിരുന്നു ഫോക്സ്വാഗൻ ടി–റോക് വിൽപന ആരംഭിച്ചത്. പ്രാദേശിക തലത്തിൽ വാഹന നിർമാണം പ്രോത്സാഹിപ്പിക്കുകയെന്ന ലക്ഷ്യത്തോടെയാണ് ആദ്യഘട്ടത്തിൽ പ്രതിവർഷം 2,500 വാഹനം ഇറക്കുമതി ചെയ്യാൻ കേന്ദ്ര സർക്കാർ അനുമതി നൽകിയിരിക്കുന്നത്. ഇക്കൊല്ലം അനുവദനീയമായ ഇറക്കുമതി പരിധി പിന്നിട്ട സാഹചര്യത്തിലാണ് ഫോക്സ്വാഗൻ ടി–റോക് ബുക്കിങ് താൽക്കാലികമായി നിർത്തിയത്.
ക്രോം ലൈനുകളുള്ള ഗ്രില്, എല്ഇഡി ഹെഡ്ലാമ്പുകളും ടെയില് ലാമ്പുകളും, ഇരട്ട വർണ 17 ഇഞ്ച് അലോയ് വീൽ, മുന്നിലും പിന്നിലും പാര്ക്കിങ് സെന്സറുകള്, പിന് പാര്ക്കിങ് ക്യാമറ, പൂര്ണ ഡിജിറ്റല് ഇന്സ്ട്രുമെന്റ് ക്ലസ്റ്റര്, ഡ്യുവൽ സോൺ ഓട്ടമാറ്റിക് ക്ലൈമറ്റ് കൺട്രോൾ, എട്ട് ഇഞ്ച് ടച് സ്ക്രീൻ, പനോരമിക് സൺറൂഫ്, വിയന്ന ലതർ സീറ്റ് തുടങ്ങിയവ ടി-റോക്ക് എസ്യുവിയുടെ പ്രധാന ഫീച്ചറുകളാണ്.
അതേസമയം മികച്ച സുരക്ഷയ്ക്കായി ആറ് എയർബാഗ്, ഇബിഡി സഹിതം എബിഎസ്, ഇഎസ്സി, ടയർ പ്രഷർ മോണിറ്ററിങ് സംവിധാനം, തുടങ്ങിയവയും ലഭ്യമാണ്. രാജ്യാന്തര വിപണികളിൽ ടിഗ്വാനു താഴെയാണ് 4.234 മീറ്റർ നീളവും 1.992 മീറ്റർ വീതിയും 1.573 മീറ്റർ ഉയരവുമുള്ള ടി–റോക്കിനു സ്ഥാനം. 150 പി എസ് കരുത്തും 250 എൻഎം ടോർക്കും സൃഷ്ടിക്കുന്ന 1.5 ലീറ്റർ ടർബോ പെട്രോൾ എൻജിൻ സഹിതമാണ് ടി–റോക്കിന്റെ വരവ്. ഏഴു സ്പീഡ് ഡിസിടി ഓട്ടോമാറ്റിക് ഗീയർബോക്സുമായെത്തുന്ന ടി– റോക്കിനു മാനുവൽ ട്രാൻസ്മിഷൻ പതിപ്പ് ലഭ്യമല്ല. മെച്ചപ്പെട്ട ഇന്ധനക്ഷമതയ്ക്കായി സിലിണ്ടർ ഡീ ആക്ടിവേഷൻ സാങ്കേതികവിദ്യയും ടി–റോക്കിലുണ്ട്.
ഫ്ലാറ്റ്-ബോട്ടം സ്റ്റിയറിങ് വീല്, ആന്ഡ്രോയിഡ് ഓട്ടോ, ആപ്പിള് കാര്പ്ലേ എന്നിവ സംയോജിപ്പിച്ച 8.0 ഇഞ്ച് ടച്ച്സ്ക്രീന് ഇന്ഫോടെയിന്മെന്റ് സിസ്റ്റം, ഓട്ടോമാറ്റിക് ഡ്യുവല് സോണ് ക്ലൈമറ്റ് കണ്ട്രോള്, ലെതര് സീറ്റുകള്, പനോരമിക് സണ്റൂഫ് തുടങ്ങിയ സവിശേഷതകളാൽ സമ്പന്നവുമാണ് ഈ ജർമൻ കാർ. ടി-റോക്കിന്റെ സുരക്ഷാ സവിശേഷതകളിൽ ആറ് എയര്ബാഗുകള്, എബിഎസ്, ഇലക്ട്രോണിക് സ്റ്റെബിലിറ്റി കൺട്രോൾ, ട്രാക്ഷന് കണ്ട്രോള്, ഇലക്ട്രോണിക് ഡിഫറന്ഷ്യല് ലോക്ക്, മോട്ടോര് സ്ലിപ്പ് റെഗുലേഷന്, ഹില്-സ്റ്റാര്ട്ട് അസിസ്റ്റ് തുടങ്ങിയ ഫീച്ചറുകളും ഫോക്സ്വാഗൺ അണിനിരത്തുന്നുണ്ട്.
Comments