ഭാരതത്തിനു അഭിമാനമായ ലോക സുന്ദരികൾ

1951 ൽ ബ്രിട്ടീഷ് വംശജനായ എറിക് മോർലി രൂപകൽപന ചെയ്ത ഏറ്റവും പഴയ അന്താരാഷ്‌ട്ര സൗന്ദര്യമത്സരമാണ് മിസ് വേൾഡ്.

മിസ്സ് വേൾഡ്, മിസ്സ് യൂണിവേഴ്സ്, മിസ് എർത്ത്, മിസ് ഇന്റർനാഷണൽ എന്നിവയാണ് ലോകത്തിലെ ഏറ്റവും വലിയ നാല് സൗന്ദര്യ മത്സരങ്ങൾ . മിസ് വേൾഡ് സൗന്ദര്യ മത്സരങ്ങളിൽ കിരീടം ചൂടിഭാരതത്തിന്റെ അഭിമാനം വാനോളം ഉയർത്തിയ സുന്ദരികൾ ഇവരൊക്കെയാണ്

1 . റീത്ത ഫാരിയ

1943 ൽ മുംബൈയിൽ ജനിച്ച റീത്ത ഫാരിയ 1966 ൽ മിസ്സ് വേൾഡ് സൗന്ദര്യമത്സരത്തിൽ വിജയം നേടിയ ആദ്യ ഇന്ത്യൻ വനിതയാണ്. മത്സരത്തിൽ വിജയിച്ചതിന് ശേഷം റീത്തയ്‌ക്ക് നിരവധി ചലച്ചിത്രലോകത്തേക്ക് ഓഫറുകൾ ലഭിച്ചുവെങ്കിലും മെഡിക്കൽ പഠനങ്ങളിൽ ശ്രദ്ധ കേന്ദ്രീകരിക്കാൻ ആണ് അവർ തീരുമാനിച്ചത് . മുംബൈയിൽ നിന്ന് എംബിബിഎസ് ബിരുദം നേടിയ ശേഷം കിംഗ്സ് കോളേജ് ആശുപത്രിയിൽ നിന്ന് വിദ്യാഭ്യാസം പൂർത്തിയാക്കാൻ വേണ്ടി ലണ്ടനിലേക്ക് പോയി. ഭർത്താവ് ഡേവിഡ് പവലിനൊപ്പം ഡബ്ലിനിലാണ് റീത്ത ഫാരിയ ഇപ്പോൾ താമസിക്കുന്നത്.

2 . ഐശ്വര്യ റായ്

28 വർഷത്തെ ഇടവേളയ്‌ക്ക് ശേഷം 1994 ൽ ഐശ്വര്യ റായ് മിസ്സ് വേൾഡ് കിരീടമണിഞ്ഞതോടെ ഇന്ത്യ വീണ്ടും സൗന്ദര്യ മത്സരവേദികളിൽ ശ്രദ്ധേയമാകാൻ തുടങ്ങി . മിസ്സ് ഇന്ത്യ മത്സരത്തിൽ പങ്കെടുത്ത അവർ 1994 ലെ മിസ്സ് വേൾഡ് മത്സരത്തിൽ ഇന്ത്യയെ പ്രതിനിധീകരിച്ച് കിരീടം നേടുകയായിരുന്നു . കോളേജ് പഠനകാലത്തു തൊട്ടു തന്നെ മോഡലിംഗ് രംഗത്ത് ചുവട് വെയ്പുകൾ നടത്തിയ ഐശ്വര്യ റായ് , മിസ് വേൾഡ് കിരീടം നേടിയതോട് കൂടി ചലച്ചിത്രലോകത്തേക്ക് കടക്കുകയായിരുന്നു .മണിരത്നത്തിന്റെ 1997 ലെ തമിഴ് ചിത്രമായ ഇരുവർ എന്ന ചിത്രത്തിലൂടെയാണ് ഐശ്വര്യ ചലച്ചിത്രലോകത്തേക്കു അരങ്ങേറ്റം കുറിച്ചത്.

3 . ഡയാന ഹെയ്ഡൻ

ഹൈദരാബാദിൽ നിന്നുള്ള ഡയാന ഹെയ്ഡൻ 1997 ൽ മിസ്സ് വേൾഡ് ആയി തിരഞ്ഞെടുക്കപ്പെട്ടു. ഈ വിജയത്തിനുശേഷം നിരവധി ടെലിവിഷൻ പരസ്യങ്ങളിൽ പ്രത്യക്ഷപ്പെടുകയും , 2003 ൽ തെഹ്‌സീബ് എന്ന ചിത്രത്തിലൂടെ ബോളിവുഡിൽ അരങ്ങേറ്റം കുറിക്കുകയും ചെയ്തു .

4 . യുക്ത മുഖി

ബാംഗ്ലൂരിൽ ജനിച്ച യുക്ത മുഖി ആണ് 1999 ൽ നടന്ന മിസ് വേൾഡ് സൗന്ദര്യ മത്സരത്തിൽ ഭാരതത്തെ പ്രതിനിധീകരിച്ചതും വിജയം കൈവരിച്ചതും .

5 . പ്രിയങ്ക ചോപ്ര

ഒരു വർഷത്തിനുശേഷം, 2000 ൽ പ്രിയങ്ക ചോപ്ര മിസ്സ് വേൾഡ് ആയി കിരീടമണിഞ്ഞതോടെ ഇന്ത്യ വീണ്ടും ശ്രദ്ധാകേന്ദ്രമായി . വിജയത്തിന് ശേഷം നിരവധി ചലച്ചിത്ര ഓഫറുകൾ ലഭിക്കുകയും പ്രിയങ്ക 2003 ൽ ബോളിവുഡിൽ അരങ്ങേറ്റം കുറിക്കുകയും ചെയ്തു.

6 . മാനുഷി ചില്ലാർ

പ്രിയങ്ക ചോപ്ര മിസ്സ് വേൾഡ് കിരീടം ചൂടി പതിനേഴ് വർഷങ്ങൾക്ക് ശേഷം 2017 ൽ ഹരിയാനയിൽ നിന്നുള്ള മാനുഷി ചില്ലാർ വീണ്ടും മിസ് വേൾഡ് കിരീടം ചൂടി ഭാരതത്തിന് അഭിമാന നേട്ടം കരസ്ഥമാക്കി .