ന്യൂഡൽഹി : ലഡാക്ക് അതിർത്തിയിൽ ചൈനീസ് പ്രകോപനം തുടരുന്ന സാഹചര്യത്തിൽ ഇന്ത്യൻ സൈന്യത്തിന്റെ കരുത്തുയർത്താൻ അമേരിക്കയിൽ നിന്നും ഡ്രോണുകൾ വാങ്ങാനൊരുങ്ങി പ്രതിരോധ മന്ത്രാലയം. ജനറൽ അറ്റോമിക് എംക്യൂ-9ബി ഗാർഡിയൻ ഡ്രോണുകളാണ് വാങ്ങാൻ ഒരുങ്ങുന്നത്. ഇതിനായുള്ള നടപടികൾ പുരോഗമിക്കുകയാണെന്നാണ് റിപ്പോർട്ട്.
അമേരിക്കയിൽ നിന്നും 30 എംക്യു ഡ്രോണുകൾ വാങ്ങാനാണ് പ്രതിരോധമന്ത്രാലയം ആലോചിക്കുന്നത്. ഡ്രോണുകൾ വാങ്ങുന്നതിനായി അമേരിക്കയുമായി രണ്ട് ഘട്ടങ്ങളുള്ള കരാറിലാകും ഇന്ത്യ ഏർപ്പെടുക. ആദ്യഘട്ട കരാറിൽ 6 ഡ്രോണുകളും, രണ്ടാം ഘട്ട കരാറിൽ ബാക്കി 24 ഡ്രോണുകളും വാങ്ങാനാണ് പദ്ധതി. ഡ്രോണുകൾ വാങ്ങുന്നതിനായി ഏകദേശം 3 ബില്യൺ ഡോളർ ചിലവ് വരുമെന്നാണ് മന്ത്രാലയം കണക്കാക്കുന്നത്.
സാറ്റ്ലൈറ്റ് ഉപയോഗിച്ച് നിയന്ത്രിക്കുന്ന അത്യാധുനിക ശേഷിയുള്ള ഡ്രോണുകൾക്ക് 45,000 അടി ഉയരത്തിൽ പറന്ന് നിരീക്ഷണം നടത്താനുള്ള കഴിവുണ്ട്. 35 മണിക്കൂർ തുടർച്ചയായി പ്രവർത്തിക്കാൻ ശേഷിയുള്ള ഇവ റഡാറുകൾ ഉപയോഗിച്ചാണ് ശത്രുക്കളെ കണ്ടെത്തി നിഷ്പ്രഭമാക്കുന്നത്.
Comments