ന്യൂഡല്ഹി: ഡല്ഹി കലാപക്കേസില് യു.എ.പി.എ ചുമത്തിയ ഉമര് ഖാലിദിനെ ഒക്ടോബര് 22 വരെ ജ്യൂഡീഷ്യല് കസ്റ്റഡിയില് വെയ്ക്കും. ഭീകരവിരുദ്ധ നിയമത്തിന്റെ വകുപ്പു ചേര്ത്താണ് മുന് ജെ.എന്.യു വിദ്യാര്ത്ഥി നേതാവിനെ പ്രത്യേക അന്വേഷണ സംഘം അറസ്റ്റ് ചെയ്തത്. പോലീസ് കസ്റ്റഡി അവസാനിച്ചതോടെ ജസ്റ്റിസ് അമിതാഭ് റാവത്തിന്റെ ബഞ്ച് വീഡിയോ കോണ്ഫറന്സ് വഴിയാണ് ഉമര് ഖാലിദിനെ തിരികെ ജ്യൂഡീഷ്യല് കസ്റ്റഡിയില് വിട്ടത്. സെപ്തംബര് 13നാണ് ഉമര് ഖാലിദിനെ അറസ്റ്റ് ചെയ്തത്.
പോലീസ് പ്രാഥമിക റിപ്പോര്ട്ടില് ഡല്ഹി കലാപം ആസുത്രണം ചെയ്യുന്നതിനുള്ള മുന്നൊരുക്കത്തില് ഉമര് ഖാലിദിനും പങ്കുണ്ടെന്നാണ് രേഖപ്പെടുത്തിയിരുന്നത്. ഉമര് ഖാലിദിനൊപ്പം മറ്റ് രണ്ടുപേരേയും കൂടി കേസ്സില് ഉള്പ്പെടുത്തി പോലീസ് അറസ്റ്റ് ചെയ്തിരുന്നു. രണ്ടു സ്ഥലങ്ങളിലായി പ്രകോപനപരമായ പ്രസംഗം നടത്തിയ ഖാലിദ് കാലപത്തിന് പ്രചോദനം നല്കിയെന്നും പോലീസ് പറയുന്നു. അമേരിക്കന് പ്രസിഡന്റ് ഡൊണാള്ഡ് ട്രംപിന്റെ ഇന്ത്യന് സന്ദര്ശന സമയത്ത് തന്നെ കലാപം നടത്തണമെന്നും റോഡുകള് തടയണമെന്നും വാഹനങ്ങള് തടയണമെന്നും ഉമര് ഖാലിദ് ആഹ്വാനം ചെയ്തുവെന്നും റിപ്പോര്ട്ടില് പറയുന്നു.
കലാപത്തിനായുള്ള ആയുധങ്ങളും സ്ഫോടകവസ്തുക്കളും ശേഖരിക്കുന്നതിലും വിതരണം ചെയ്യുന്നതിലും ഉമര് ഖാലിദടങ്ങുന്ന സംഘത്തിന് പങ്കുണ്ടെന്നും പോലീസ് കോടതിയെ അറിയിച്ചു. ഫെബ്രുവരി 24നാണ് പൗരത്വ നിയമ ഭേദഗതിക്കെതിരെ ഡല്ഹിയില് കലാപം നടത്തിയത്. കലാപത്തില് 53പേര് കൊല്ലപ്പെടുകയും 200 പേര്ക്ക് ഗുരുതരമായി പരിക്കേല്ക്കുകയും ചെയ്തു.
Comments