ഓരോ വർഷവും നൂറ് കണക്കിന് സിനിമകൾ ആണ് മലയാള ഭാഷയിൽ പുറത്തിറങ്ങുന്നത് . അതിന് പുറമെ അന്യഭാഷാ ചിത്രങ്ങളും , മൊഴിമാറ്റം ചെയ്യപ്പെട്ട ചിത്രങ്ങളും മലയാളക്കരയിൽ എത്തുന്നു . എന്നിരുന്നാലും തീയേറ്ററുകളിൽ എത്തി വർഷങ്ങൾ പിന്നിട്ടിട്ടും പ്രേക്ഷകർ വീണ്ടും വീണ്ടും കാണാൻ ഇഷ്ടപ്പെടുകയും കാണുകയും ചെയ്യുന്ന ചില സിനിമകൾ ഉണ്ട് . അത്തരത്തിൽ പ്രേക്ഷകർ ഇന്നും ഹൃദയത്തിൽ കൊണ്ട് നടക്കുന്ന ചില സിനിമകൾ ഇവയൊക്കെയാണ്
1 . തൂവാനത്തുമ്പികൾ
1987 ൽ പദ്മരാജൻ തിരക്കഥയും സംവിധാനവും നിർവഹിച്ച ചിത്രമാണ് തൂവാനത്തുമ്പികൾ . നൂറ് ദിവസം തീയേറ്ററുകളിൽ നിറഞ്ഞ ഓടിയ ഈ സിനിമ ഇന്നും പ്രേക്ഷകരുടെ മനസ്സിൽ നിറഞ്ഞു നിൽക്കുന്ന ഒന്നാണ് . ജയചന്ദ്രന്റെയും ക്ലാരയുടെയും പ്രണയം മായാതെ ഹൃദയങ്ങളിൽ ഇന്നും നിലനിൽക്കുന്നു . മേഘം പൂത്തു തുടങ്ങി , ഒന്നാം രാഗം തേടി എന്നീ ഗാനങ്ങൾ ഇന്നും കേൾക്കാത്തവരായി ആരും തന്നെ കാണില്ല .
2 . ഒരു വടക്കൻ വീരഗാഥ
ഹരിഹരൻ , എം ടി വാസുദേവൻ നായർ കൂട്ടുകെട്ടിൽ 1989 ൽ പിറന്ന ചരിത്ര കഥപറയുന്ന മനോഹരമായ ഒരു ചിത്രമായിരുന്നു ഒരു വടക്കൻ വീരഗാഥ . പഴയകാല സിനിമകളിലും മറ്റും ചിത്രീകരിച്ച ചതിയൻ ചന്തു എന്ന കഥാപാത്രത്തിന് പുതിയ ഒരു രൂപവും സങ്കല്പവും നൽകിയ ചിത്രമായിരുന്നു വടക്കൻ വീരഗാഥ . നാല് ദേശീയ അവാർഡുകളും ഏഴ് സംസ്ഥാന അവാർഡുകളും നേടിയ ചിത്രം നൂറിൽ കൂടുതൽ ദിനങ്ങൾ തീയേറ്ററുകളിൽ ഓടിയ ഒരു ചിത്രം കൂടിയാണ് . ചന്തു എന്ന കഥാപാത്രം ജനഹൃദയങ്ങളിൽ ഇന്നും ജീവിക്കുന്നത് ഒരു വടക്കൻ വീരഗാഥ എന്ന ചിത്രത്തിലൂടെയാണ് .
3 . സന്ദേശം
ശ്രീനിവാസന്റെ തിരക്കഥയിൽ , സത്യൻ അന്തിക്കാട് സംവിധാനം ചെയ്തു 1991 ൽ പുറത്തിറങ്ങിയ ചിത്രമാണ് സന്ദേശം . ഇന്ന് നാം കാണുന്ന രാഷ്ട്രീയ കോലാഹലങ്ങൾ മുപ്പത് വർഷം മുൻപ് തന്നെ ജനങ്ങളിൽ എത്തിച്ച സിനിമ കൂടിയായിരുന്നു സന്ദേശം . രാഷ്ട്രീയ കോലാഹലങ്ങളെ ആക്ഷേപ ഹാസ്യത്തിലൂടെ അവതരിപ്പിച്ച ചിത്രത്തിന് ഇന്നത്തെ സാഹചര്യവുമായി ഒരുപാട് പൊരുത്തങ്ങൾ ഉണ്ട് . കൂടാതെ സന്ദേശം എന്ന ചിത്രത്തിലെ പല സംഭാഷണങ്ങളും രംഗങ്ങളും ഇന്നും ആക്ഷേപ ഹാസ്യത്തിനായി ഉപയോഗിച്ച് പോരുന്നു എന്നുള്ളത് പ്രേക്ഷക ഹൃദയങ്ങളിൽ ഈ ചിത്രം മായാതെ കിടക്കുന്നു എന്നുള്ളതിന്റെ ഉത്തമ തെളിവാണ് .
4 . കിലുക്കം
വേണു നാഗവള്ളി രചിച്ചു , പ്രിയദർശൻ സംവിധാനം ചെയ്ത കോമഡി ചിത്രം ആയിരുന്നു 1991 ൽ പുറത്തിറങ്ങിയ കിലുക്കം . ഇന്നും ഈ ചിത്രം ടെലിവിഷനിൽ സംപ്രേക്ഷണം ചെയ്യുമ്പോൾ ആളുകൾ കണ്ടാസ്വദിക്കുന്നു എന്നുള്ളത് വാസ്തവപരവും അതിലുപരി അത്ഭുതവും തോന്നിപ്പിക്കുന്ന കാര്യമാണ് . ഈ സിനിമയിലെ പല സംഭാഷണങ്ങളും , ഇന്നത്തെ ജീവിത സാഹചര്യത്തിൽ ആളുകൾ ഉപയോഗിക്കുന്നു എന്നുള്ളതും ശ്രദ്ധേയമാണ് .
5 . മണിച്ചിത്രത്താഴ്
മധു മുട്ടത്തിന്റെ തിരക്കഥയിൽ , ഫാസിൽ സംവിധാനം ചെയ്ത ഹൊറർ സൈക്കോളജിക്കൽ ത്രില്ലർ സിനിമ ആയിരുന്നു 1993 ൽ ഇറങ്ങിയ മണിച്ചിത്രത്താഴ് . മേല്പറഞ്ഞ ചിത്രങ്ങൾ എല്ലാം പോലെ തന്നെ ഇന്നും സംപ്രേക്ഷണം ചെയ്യുമ്പോൾ കണ്ണിമ വെട്ടാതെ കാണുന്ന മറ്റൊരു ക്ലാസിക് ചിത്രമാണ് മണിച്ചിത്രത്താഴ് . ശോഭന എന്ന നടിയുടെ അഭിനയപാടവത്തിന്റെ മാറ്റു തെളിയിച്ച ഒരു മുറൈ വന്ത് പാർത്തായ എന്ന ഗാന രംഗം ഒരിക്കലും ആർക്കും മറക്കാൻ കഴിയുന്ന ഒന്നല്ല .
Comments