കൊച്ചി: മലയാള സിനിമയിൽ സജീവ സാന്നിധ്യമാകാൻ ഒരുങ്ങുകയാണ് ഇന്ത്യൻ സിനിമാ കമ്പനി. അനുരാജ് മനോഹർ സംവിധാനം ചെയ്ത നരിവേട്ടയിലൂടെ സിനിമാ നിർമ്മാണരംഗത്തേക്ക് പ്രവേശിച്ച കമ്പനി, തുടർന്നും വ്യത്യസ്ത പശ്ചാത്തലങ്ങളിലുള്ള സിനിമകളുമായി എത്തുകയാണ്. നിലവിൽ രണ്ട് ചിത്രങ്ങളുടെ നിർമ്മാണ പ്രവർത്തനങ്ങൾ ഒരേസമയം പുരോഗമിക്കുകയാണ്.
വയനാടൻ മലനിരകളിൽ നടന്ന അവകാശ സമരത്തിന്റെ പശ്ചാത്തലത്തിൽ ക്ലീൻ എന്റർടൈനറായി ഒരുക്കിയ ‘നരിവേട്ട’യിലൂടെയായിരുന്നു ഇന്ത്യൻ സിനിമാ കമ്പനിയുടെ മലയാള സിനിമയിലേക്കുള്ള അരങ്ങേറ്റം. ചിത്രത്തിന് പ്രേക്ഷക പ്രശംസയും അംഗീകാരങ്ങളും ലഭിച്ചതിനൊപ്പം സാമ്പത്തിക വിജയവും നേടാനായതായി അണിയറപ്രവർത്തകർ പറയുന്നു.
ഗൾഫ് മേഖലയിൽ ദീർഘകാലമായി ബിസിനസ് രംഗത്ത് പ്രവർത്തിക്കുന്ന ടിപ്പു ഷാനും ഷിയാസ് ഹസ്സനുമാണ് ഇന്ത്യൻ സിനിമാ കമ്പനിയുടെ സാരഥികൾ. കലയും സിനിമയും എന്നും താൽപ്പര്യമുള്ള മേഖലകളായിരുന്നുവെന്നും അതിന്റെ ഭാഗമായാണ് സിനിമാ നിർമ്മാണ സ്ഥാപനത്തിന് തുടക്കമിട്ടതെന്നും ടിപ്പു ഷാൻ പറഞ്ഞു.
മറ്റ് ബിസിനസുകളിൽനിന്ന് വ്യത്യസ്തമാണ് സിനിമയെന്നും ഒരു സിനിമ പ്രേക്ഷകർക്ക് ആസ്വാദനവും സന്തോഷവും നൽകണമെന്നുമാണ് ടിപ്പു ഷാന്റെ നിലപാട്. പ്രേക്ഷകർക്ക് ലഭിക്കുന്ന സംതൃപ്തിയാണ് സിനിമയുടെ വിജയത്തിന്റെയും അതിന് പിന്നിൽ പ്രവർത്തിക്കുന്നവരുടെ നിലനിൽപ്പിന്റെയും പ്രധാന ഘടകമെന്നും അദ്ദേഹം വ്യക്തമാക്കി.
ഷറഫുദീനും അലൻ ബിൻ സിറാജും പ്രധാന വേഷങ്ങളിൽ
ഷറഫുദീനും ‘വാഴ 2’ ഫെയിം അലൻ ബിൻ സിറാജും കേന്ദ്ര കഥാപാത്രങ്ങളായി എത്തുന്ന ചിത്രമാണ് നിലവിൽ മൈസൂരിൽ ചിത്രീകരണം പുരോഗമിക്കുന്നത്. നവാഗതനായ ജിതേഷ് എസ്. റാം സംവിധാനം ചെയ്യുന്ന ചിത്രത്തിന്റെ ചിത്രീകരണം സെപ്റ്റംബർ നാലിനാണ് മൈസൂരിൽ ആരംഭിച്ചത്.
ഹ്യൂമർ, ഫാമിലി എന്റർടൈനർ വിഭാഗത്തിൽ ഒരുക്കുന്ന ചിത്രമാണിത്. കഥയുടെ പുതുമയ്ക്കും അവതരണത്തിനും പ്രാധാന്യം നൽകുന്ന സിനിമ പ്രേക്ഷകർക്ക് ഹൃദ്യമായ ദൃശ്യാനുഭവം സമ്മാനിക്കാനാണ് ഒരുങ്ങുന്നതെന്ന് അണിയറപ്രവർത്തകർ പറയുന്നു.
ടീനേജ് റോം കോമുമായി മറ്റൊരു ചിത്രം
ഇന്ത്യൻ സിനിമാ കമ്പനി നിർമ്മിക്കുന്ന മറ്റൊരു ചിത്രത്തിന്റെ ചിത്രീകരണവും സെപ്റ്റംബർ 21ന് ആരംഭിച്ചു. നവാഗതനായ രോഹിത് ചന്ദ്രശേഖരൻ സംവിധാനം ചെയ്യുന്ന ചിത്രം ടീനേജ് റോം കോം പശ്ചാത്തലത്തിലാണ് ഒരുങ്ങുന്നത്.
പ്ലസ് വൺ, പ്ലസ് ടു വിദ്യാർഥികളുടെ ജീവിതത്തിലൂടെയാണ് കഥ മുന്നോട്ടുപോകുന്നത്. യുവതലമുറയെയും കുടുംബപ്രേക്ഷകരെയും ഒരുപോലെ ആകർഷിക്കുന്ന തരത്തിലാണ് ചിത്രം ഒരുക്കുന്നത്. അങ്കമാലിയും പരിസര പ്രദേശങ്ങളുമാണ് പ്രധാന ലൊക്കേഷനുകൾ.
ഓഡിയേഷനിലൂടെ തിരഞ്ഞെടുക്കപ്പെട്ട പുതുമുഖ താരങ്ങളാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. പുതിയ ചിന്തകളും പുതിയ പ്രതിഭകളെയും സിനിമയിലേക്ക് അവതരിപ്പിക്കുന്നതിനാണ് ഈ ചിത്രങ്ങളിലൂടെ പ്രാധാന്യം നൽകുന്നതെന്നും അണിയറപ്രവർത്തകർ വ്യക്തമാക്കുന്നു.
രണ്ട് ചിത്രങ്ങളുടെ ചിത്രീകരണം ഒരേസമയം പുരോഗമിക്കുന്നതിനൊപ്പം ഇന്ത്യൻ സിനിമാ കമ്പനിയുടെ മറ്റ് സിനിമകളുടെ പ്രീ-പ്രൊഡക്ഷൻ നടപടികളും മുന്നോട്ടുപോകുകയാണ്. ഇതിൽ ഒരു ചിത്രത്തിന്റെ ചിത്രീകരണം ഉടൻ ആരംഭിക്കുമെന്നും നിർമ്മാതാവ് ടിപ്പു ഷാൻ അറിയിച്ചു.
‘നരിവേട്ട’യിലൂടെ മലയാള സിനിമയിൽ തുടക്കം കുറിച്ച ഇന്ത്യൻ സിനിമാ കമ്പനി, വ്യത്യസ്ത ജോണറുകളിലുള്ള സിനിമകളും പുതിയ തലമുറയിലെ സംവിധായകരെയും താരങ്ങളെയും പരിചയപ്പെടുത്തിക്കൊണ്ട് നിർമ്മാണരംഗത്ത് കൂടുതൽ സജീവമാകാനുള്ള ഒരുക്കത്തിലാണ്.
