പാരീസ്: മാനവരാശിക്കായുള്ള ഇൻഷൂറൻസാണ് ജൈവവൈവിധ്യ സംരക്ഷ ണമെന്ന ഫ്രഞ്ച് പ്രസിഡന്റ് ഇമ്മാനുവൽ മാക്രോൺ. ആഗോള പരിശ്രമം ജൈവവൈവിധ്യത്തെ തിരികെ കൊണ്ടുവരാനായിരിക്കണം. ആഗോള പരിസ്ഥിതി രക്ഷയ്ക്കായി ലോകരാജ്യങ്ങളുടെ ഒരുമിച്ചുള്ള പ്രവർത്തനം അനിവാര്യമാണെന്നും മാക്രോൺ പറഞ്ഞു. ഐക്യരാഷ്ട്ര സഭയുടെ പരിസ്ഥിതി ഉച്ചകോടിയിലാണ് ഫ്രഞ്ച് പ്രസിഡന്റ് സന്ദേശം നൽകിയത്.
‘മാനവ സമൂഹത്തിന് മറ്റ് ജീവജാലങ്ങളേക്കാൽ കൂടുതൽ അവകാശം ഈ ഭൂമിയിലുണ്ടെന്ന് താൻ കരുതുന്നില്ല. എന്നാൽ ഭൂമിയുടെ സംരക്ഷണത്തിന് മാനവസമൂഹത്തിന് മാത്രമേ എന്തെങ്കിലും ചെയ്യാനാകൂ എന്നതിലും തനിക്ക് സംശയവുമില്ല. തന്നെ സംബന്ധിച്ച് ഈ ഒരു ചിന്തയാണ് ജൈവവൈവിധ്യ സംരക്ഷണത്തിനായുള്ള താത്വികവും ധാർമ്മികവുമായ അടിസ്ഥാനം’ മാക്രോൺ പ്രസംഗത്തിൽ പറഞ്ഞു.
പരിസ്ഥിതി നശിപ്പിക്കുന്നത് ആഗോള തലത്തിൽ കുറ്റകൃത്യമായി പ്രഖ്യാപി ക്കണം. പരിസ്ഥിതിക്കെതിരായി നടക്കുന്ന എല്ലാ അനധികൃത പ്രവർത്തനങ്ങളും അതിനെ സംരക്ഷിക്കുന്ന ഭരണകൂട അഴിമതികളും കുറ്റകരമായ വകുപ്പുകളിട്ട് ശിക്ഷിക്കപ്പെടണമെന്നും മാക്രോൺ ആവശ്യപ്പെട്ടു. പാരീസ് ഉടമ്പടിയിലൂടെ പരിസ്ഥിതി സംരക്ഷണത്തിനായി നടത്തിയ ശ്രമങ്ങളുടെ അന്ത:സത്ത എല്ലാവരും കാത്തുസൂക്ഷിക്കണം. എല്ലാവരും അവരുടെ കടമകൾ ഗുണപരമായും എടുത്തുകാണിക്കാൻ പാകത്തിനും നിർവ്വഹിക്കണമെന്നും മാക്രോൺ കൂട്ടിച്ചേർത്തു.
Comments