വാഹനേപ്രമികളുടെ കാത്തിരിപ്പിന് വിരാമം ഇട്ടു കൊണ്ട് മഹീന്ദ്ര ഥാറിന്റെ വില പ്രഖ്യാപിച്ചു. പെട്രോൾ- ഡീസൽ എഞ്ചിനുകളിലും ഓട്ടോമാറ്റിക്- മാനുവൽ ട്രാൻസ്മിഷനുകളിലുമായി എട്ട് വേരിയന്റുകളിലെത്തുന്ന ഥാറിന് 9.80 ലക്ഷം മുതൽ 12.95 ലക്ഷം രൂപ വരെയാണ് എക്സ് ഷോറൂം വില. എ എക്സ്, എൽഎക്സ് എന്നീ രണ്ട് സീരിസിലാണ് ഥാർ എത്തുന്നത്. എ എക്സ് അഡ്വഞ്ചർ മോഡിലും എൽഎക്സ് ലൈഫ് സ്റ്റൈൽ മോഡലുമായിരിക്കും.
ഓഗസ്റ്റ് 15 നാണ് വാഹനം വിപണിയിൽ എത്തിയത്. മുൻ തലമുറ ഥാറിനേക്കാൾ പ്രീമിയം ലുക്ക് വരുത്തിയാണ് പുതിയ ഥാർ എത്തിയിട്ടുള്ളത്. മുൻവശത്തെ പുത്തൻ ബമ്പറാണ് പുതിയ ഥാരിന്റെ പ്രത്യേകത. ഇതിന്റെ ഇരുവശങ്ങളിലുമായി ഒരുക്കിയിരിക്കുന്ന ഫോഗ് ലാമ്പ്, എൽഇഡി ഹെഡ്ലാമ്പ്, ഏഴ് സ്ലാറ്റ് ഗ്രിൽ, ടേൺ ഇന്റിക്കേറ്റർ എന്നിവയും വാഹനത്തിന്റെ പുതുമകളാണ്. എൽഇഡി ടെയിൽലാമ്പുകൾ, ബമ്പർ ഡിസൈൻ എന്നീ പ്രത്യേകതകളാണ് വാഹനത്തിന്റെ പിൻ വശത്തെ മാറ്റങ്ങൾ. ഹാർഡ് ടോപ്പ് മോഡൽ ആയതിനാൽ ഗ്ലാസ്സിട്ട ഹാച്ച്ഡോർ, ഡോറിന് മധ്യഭാഗത്ത് സ്ഥാപിച്ചിരിക്കുന്ന സ്റ്റെപ്പിനി ടയർ, ബമ്പറിലെ റീഫ്ലക്ഷൻ എന്നിവയും വാഹനത്തിന് പിന്നിലെ പ്രത്യേകതകളാണ് ആണ്.
അകത്തളത്തെ മനോഹരമാക്കാനായി പുത്തൻ ഡാഷ്ബോർഡ് ഇൻഫോടെയ്ൻമെന്റ് സിസ്റ്റം, ക്ലൈമറ്റ് കണ്ട്രോൾ, ഫോർ വീൽ ഡ്രൈവ് ലിവർ, മൾട്ടി ഫങ്ഷൻ സ്റ്റിയറിങ് വീൽ, ക്യാപ്റ്റൻ സീറ്റ് എന്നിവയും ഥാറിൽ ഒരുക്കിയിട്ടുണ്ട്.
140 ബിഎച്ച്പി കരുത്ത് ഉൽപ്പാദിപ്പിക്കാൻ ശേഷിയുള്ള 2.0 ലിറ്റർ ടർബോ ഡീസൽ യൂണിറ്റും 180 ബിഎച്ച്പി കരുത്ത് ഉൽപ്പാദിപ്പിക്കാൻ ശേഷിയുള്ള 2.0 ലിറ്റർ TGDi എംസ്റ്റാലിയൻ ടർബോ പെട്രോൾ എഞ്ചിനുകളിലുമാണ് ഥാർ എത്തുന്നത്. മാനവുവൽ ട്രാൻമിഷനൊപ്പം എൽഎക്സ് വേരിയന്റിൽ ആറ് സ്പീഡ് ഓട്ടോമാറ്റിക് ട്രാൻസ്മിഷനും നൽകും.
ഫോർവീൽ ഡ്രൈവ് സംവിധാനമാണ് വാഹനത്തിന്റെ മറ്റൊരു സവിശേഷത. ഫോർ വീൽ ഡ്രൈവ് ലോ, ഫോർ വീൽ ഡ്രൈവ് ഹൈ, ടൂ വീൽ ഡ്രൈവ് എന്നിവയാണ് വാഹനത്തിലെ മറ്റ് മോഡുകൾ.
Comments