ദാഹം അടക്കാനായി ഒരു നാരങ്ങ വെള്ളം കുടിക്കണമെങ്കില്‍ നമ്മള്‍ പത്ത് രൂപ കൊടുക്കണം. എന്നാല്‍ ഇവിടെ ഒരു രൂപ മാത്രം മുടക്കിയാല്‍ മതി നമ്മുടെ ദാഹം മാത്രമല്ല വിശപ്പും അകറ്റും ഈ ഇഡ്ഡലി മുത്തശ്ശി. കേള്‍ക്കുമ്പോള്‍ ആതിശയമോ അത്ഭുതമോ തോന്നാമെങ്കിലും സംഭവം സത്യമാണ്. ഒരു രൂപയ്ക്ക് വിശപ്പറിഞ്ഞ് ഇഡ്ഡലിയും കൂടെ സാമ്പാറും ചട്‌നിയും നല്‍കുന്ന ഒരു മുത്തശ്ശിയുണ്ട്. നമ്മുടെ സ്വന്തം കമലത്താള്‍. തമിഴ്‌നാട്ടിലെ വാദിവേലമ്പാളയത്തിലാണ് കമലത്താള്‍ എന്ന മുത്തശ്ശിയമ്മയുടെ ഇഡ്ഡലി ലഭിയ്‌ക്കുന്നത്. വര്‍ഷങ്ങള്‍ ഒത്തിരിയായി കമലത്താള്‍ ആളുകള്‍ക്ക് വയറു നിറയെ കഴിക്കാന്‍ കുറഞ്ഞ നിരക്കില്‍ ഇഡ്ഡലി വിളമ്പാന്‍ തുടങ്ങിയിട്ട്. ഒരു ദിവസം നിരവധി ആളുകള്‍ എത്താറുണ്ട് ഈ മുത്തശ്ശിയുടെ അടുത്ത്.
എണ്‍പതു വയസ്സുളള മുത്തശ്ശി ഇഡ്ഡലി ഉണ്ടാക്കാന്‍ ആവശ്യമായ മാവ് സ്വന്തമായി തന്നെയാണ് ഉണ്ടാക്കുന്നത്. ആവശ്യമുളള മാവ് തലേ ദിവേസം തന്നെ അരച്ച് വയ്‌ക്കുന്നു. രാവിലെ ആയാല്‍ പിന്നെ ഇഡ്ഡലി ഉണ്ടാക്കി തുടങ്ങും. മാവ് തീരുന്നതു വരെ ഇഡ്ഡലി ഉണ്ടാക്കും. ബാക്കി മാവ് നാളേയ്‌ക്ക് എടുത്ത് വെക്കുന്ന പതിവൊന്നും ഈ ഇഡ്ഡലി മുത്തശ്ശിക്കില്ല. കടയില്‍ ചെല്ലുന്ന ആളുകള്‍ക്ക് ഇഡ്ഡലിയും കൂടെ സാമ്പാറും ചട്‌നിയും വിളമ്പുന്നത് ആലിലയിലോ തേക്കിലയിലോ ആണ്. മുത്തശ്ശിയമ്മ ഇങ്ങനെ ഒരു രൂപയ്ക്ക് ഇഡ്ഡലി നല്‍കാന്‍ ഒരു കാരണമുണ്ട്.
ഇവിടെ താമസിക്കുന്ന ആളുകള്‍ അധികവും സാധാരണക്കാരാണ്. അവര്‍ ജോലി ചെയ്യുന്നത് ചെറിയ കൂലിയ്‌ക്കാണ്. പലപ്പോഴും അധിക ആളുകളും പൈസ മുടക്കി ഭക്ഷണം കഴിക്കാറില്ല. ഇത്തരക്കാര്‍ക്ക് കുറഞ്ഞ വിലയില്‍ വയറു നിറയെ ഭക്ഷണം നല്‍കുക എന്നതാണ് കമലത്താളിന്റെ ലക്ഷ്യം. അമ്പത് പൈസയായിരുന്നു മുന്‍പ് ഇഡ്ഡലിയുടെ വില. പത്ത് വര്‍ഷം മുന്‍പാണ് ഇത് ഒരു രൂപയാക്കി മാറ്റിയത്. സോഷ്യല്‍ മീഡിയയിലെ താരമായി മാറിയ കമലത്താള്‍ മുത്തശ്ശി ഇപ്പോള്‍ ഇഡ്ഡലി മുത്തശ്ശി എന്നാണ് സോഷ്യല്‍ മീഡിയയില്‍ അറിയപ്പെടുന്നത്.
