ഔഷധ ഗുണങ്ങള് ഏറെയുളള ഒരു സസ്യമാണ് ആടലോടകം. ആയുര്വേദത്തില് ഏറെ ഉപയോഗിക്കപ്പെടുന്ന ഒന്നാണിത്. ആടലോടകത്തിന്റെ ഇലയും പൂവും വേരും വിത്തും തുടങ്ങി എല്ലാ ഭാഗങ്ങളും ഔഷധയോഗ്യമാണ്. ആയുര്വേദത്തില് നിരവധി ഒറ്റമൂലികള്ക്കും മറ്റു ഔഷധ നിര്മ്മാണത്തിനും ഉപയോഗിക്കുന്ന ഒന്നാണ് ആടലോടകത്തിന്റെ ഇലകള്. ചുമ മാറുന്നതിനുളള ഏറ്റവും ഉത്തമമായ മരുന്നാണ് ആടലോടകം. നെഞ്ചിലെ കഫക്കെട്ടു മാറ്റാനുളള ആയുര്വേദ ഔഷധ നിര്മാണത്തില് ഏറെ പ്രധാനമാണ് ആടലോടകം. ആടലോടകത്തിന്റെ ഇലയുടെ നീര് തേനില് ചേര്ത്ത് ദിവസവും മൂന്ന് നേരം വീതം കുടിച്ചാല് ചുമ മാറുകയും, ആടലോടകത്തിന്റെ ഇലയുടെ നീരും ഇഞ്ചിനീരും തേനും ചേര്ത്ത് കഴിച്ചാല് കഫം ഇല്ലാതാകുകയും ചെയ്യുന്നു.
രക്തപിത്തം, പനി, ക്ഷയം, നെഞ്ചു വേദന, അതിസാരം, കാസം, ശ്വാസം എന്നിവയ്ക്കുളള മരുന്നായി ആടലോടകം ഉപയോഗിക്കുന്നു. കൂടാതെ ഇത് രക്തസ്രാവത്തെ ശമിപ്പിക്കുന്നു. ആടലോടകത്തിന്റെ ഇലയും ചന്ദനവും സമം ചേര്ത്ത് അരച്ച് പതിനഞ്ച് മില്ലി വീതം രാവിലെയും വൈകിട്ടും പതിവായി കഴിച്ചാല് രോമകൂപത്തിലൂടെ രക്തം വരുന്നത് ഇല്ലാതാകും. ആടലോടകത്തിന്റെ ഇലയുടെ നീര് ഒരു ടീസ്പൂണ് വീതം ദിവസവും മൂന്നു നേരം കഴിച്ചാല് ക്ഷയരോഗത്തിന്റെ ആദ്യ അവസ്ഥയിലുളള ചുമയ്ക്ക് ആശ്വാസം ലഭിക്കുന്നു. ആടലോടകത്തിന്റെ നീരും ചന്ദനവും സമം അരച്ച് രാവിലെയും വൈകുന്നേരവും പതിവായി ഉപയോഗിച്ചാല് രക്തപിത്തം ശമിക്കും.
കൂടാതെ രക്താര്ശസ്, രക്താതിസാരം എന്നിവയ്ക്കും നല്ലതാണ്. രക്തത്തിലെ പ്ലേറ്റ്ലെറ്റുകളുടെ എണ്ണം കൂട്ടാന് ആടലോടകത്തിന്റെ വേരിന്റെ തൊലിയില് അടങ്ങിയിട്ടുളള വാസിസൈന് സഹായിക്കുന്നു. നേത്രരോഗങ്ങള്ക്ക് ആടലോടകത്തിന്റെ പൂവില് നിന്നും നീരെടുത്ത് കണ്ണില് ഒഴിക്കുന്നത് വളരെ നല്ലതാണ്. ആസ്ത്മ രോഗത്തിന് ഏറെ ശമനം നല്കുന്ന ഒന്നാണ് ആടലോടകത്തിന്റെ ഇലകള്. ഔഷധ ഗുണമുളള സസ്യം എന്നതിനോടൊപ്പം ഒരു നല്ല കീടനാശിനി കൂടിയാണ് ആടലോടകം. കുമിളുകള്, ബാക്ടീരിയകള്, കീടങ്ങള് തുടങ്ങിയവയെ ശമിപ്പിക്കാനുളള കഴിവ് ആടലോടകത്തിനുണ്ട്.
Comments