ന്യൂഡല്ഹി: ഗ്രാമീണ ഇന്ത്യയുടെ പ്രധാന പരിഷക്കരണ ശ്രമങ്ങളുടെ ഭാഗമായി കേന്ദ്രസര്ക്കാര് നടപ്പിലാക്കുന്ന ഉടമസ്ഥാവകാശ പദ്ധതിയ്ക്ക് പ്രധാനമന്ത്രി ഇന്ന് തുടക്കം കുറിക്കും. ഗ്രാമീണ മേഖലയിലെ ഭൂ ഉടമകള്ക്ക് പ്രോപ്പര്ട്ടി കാര്ഡുകള് വിതരണം ചെയ്തുകൊണ്ടാണ് പ്രധാനമന്ത്രി പദ്ധതിയ്ക്ക് തുടക്കം കുറിക്കുക.
പദ്ധതിയുടെ ഭാഗമായി ഒരു ലക്ഷം ഭൂ ഉടമകള്ക്ക് അവരുടെ മൊബൈല് ഫോണുകളില് ലഭിച്ച എസ്എംസിന്റെ ലിങ്കില് നിന്ന് പ്രോപ്പര്ട്ടി കാര്ഡുകള് ഡൗണ്ലോഡ് ചെയ്യാന് കഴിയും.അതിന് ശേഷം ബന്ധപ്പെട്ട സംസ്ഥാന സര്ക്കാരുകള് ഫിസിക്കല് കാര്ഡുകള് വിതരണം ചെയ്യും.
6 സംസ്ഥാനങ്ങളിലെ 763 ഗ്രാമങ്ങള്ക്ക് പദ്ധതിയുടെ പ്രയോജനം ലഭിക്കും. ഉത്തര്പ്രദേശിലെ 346 ഗ്രാമങ്ങള്, ഹരിയാനയില് 221, മഹാരാഷ്ട്രയില് 100, മധ്യപ്രദേശില് 44, ഉത്തരാഖണ്ഡില് 50, കര്ണാടകയില് 2 ഗ്രാമങ്ങള് എന്നിങ്ങനെയാണ് ആദ്യഘട്ടത്തില് ഉള്പ്പടുന്നത്. മഹാരാഷ്ട്ര ഒഴികെയുള്ള എല്ലാ സംസ്ഥാനങ്ങളിലെയും ഗുണഭോക്താക്കള്ക്ക് ഒരു ദിവസത്തിനകം ഫിസിക്കല് കാര്ഡ് ലഭിക്കും. മഹാരാഷ്ട്രയിലെ ഭൂവുടമകള്ക്ക് പ്രോപ്പര്ട്ടി കാര്ഡ് ലഭിക്കാന് ഒരു മാസമെടുക്കും. പ്രോപ്പര്ട്ടി കാര്ഡിന് സാധാരണ ഫീസ് ഏര്പ്പെടുത്താന് മഹാരാഷ്ട്ര സര്ക്കാര് ആലോചിക്കുന്നതായാണ് സൂചന.
വായ്പയെടുക്കാനായി ഭൂ ഉടമകള്ക്ക് ഇനി പ്രോപ്പര്ട്ടി കാര്ഡുകള് ഉപയോഗിക്കാം. ഈ പദ്ധതി പ്രകാരം, പ്രോപ്പര്ട്ടി ഉടമകള്ക്ക് അവരുടെ സ്വത്ത് സാമ്പത്തിക സ്വത്തായി ഉപയോഗിക്കാന് കഴിയും. വായ്പയുടെ അപേക്ഷ ഉള്പ്പെടെയുള്ള മറ്റ് സാമ്പത്തിക ആനുകൂല്യങ്ങള്ക്കായി ഇത് ഉപയോഗിക്കാമെന്നതാണ് ഏറെ പ്രത്യേകത.
എന്താണ് ഉടമസ്ഥാവകാശ പദ്ധതി?
കേന്ദ്രസര്ക്കാരിന്റെ പഞ്ചായത്തിരാജ് മന്ത്രാലയം ആരംഭിച്ച പ്രത്യേക പദ്ധതിയാണിത്. 2020 ഏപ്രില് 24 ദേശീയ പഞ്ചായത്തിരാജ് ദിനത്തിലാണ് പ്രധാനമന്ത്രി പദ്ധതി പ്രഖ്യാപിച്ചത്. . ഗ്രാമീണ മേഖലയിലെ ഭൂ ഉടമകള്ക്ക് ഭൂമിയുടെ ‘അവകാശ രേഖ’ നല്കുന്നതിന് പ്രോപ്പര്ട്ടി കാര്ഡുകള് വിതരണം ചെയ്യുക എന്നതാണ് ഈ പദ്ധതിയുടെ ലക്ഷ്യം. ഈ പദ്ധതി ഘട്ടം ഘട്ടമായി 4 വര്ഷത്തിനുള്ളില് നടപ്പാക്കും. 2020 നും 2024 നും ഇടയില് ഇത് പൂര്ത്തീകരിക്കുകയും രാജ്യത്തെ 6.62 ലക്ഷം ഗ്രാമങ്ങളെ പദ്ധതിയില് ഉള്പ്പെടുത്തുകയും ചെയ്യും. 2020-21 പ്രാരംഭ കാലഘട്ടത്തില് ഒരു ലക്ഷം ഗ്രാമങ്ങള് ആണ് പദ്ധതിയില് ഉള്പ്പെടുന്നത്. പ്രാരംഭ ഘട്ടത്തില് ഉത്തര്പ്രദേശ്, ഹരിയാന, മഹാരാഷ്ട്ര, മധ്യപ്രദേശ്, ഉത്തരാഖണ്ഡ്, കര്ണാടക എന്നിവിടങ്ങളിലെ ഗ്രാമങ്ങളും പഞ്ചാബിന്റെയും രാജസ്ഥാനിന്റെയും അതിര്ത്തിയിലുള്ള ചില ഗ്രാമങ്ങളും ആണ് ഉള്പ്പെടുന്നത്.
