ദുബായ്: തോല്വികള്ക്കിടയിലും രാജസ്ഥാന് റോയല്സിന് ആശ്വാസമാകുന്നത് ജോഫ്ര ആര്ച്ചര് എന്ന ഇംഗ്ലീഷ് പേസറുടെ കൃത്യതയും വേഗതയുമാണ്. രാജസ്ഥാന് ആരാധകര് ഉയര്ത്തിക്കാട്ടിയതും ആര്ച്ചറിന്റെ തീപ്പൊരി ബൗണ്സറുകളായിരുന്നു. എന്നാല്, ആര്ച്ചറിനേക്കാള് ഒരുപടി മുകളില് തങ്ങളുടെ പക്കല് ഒരാളുണ്ടെന്നാണ് ഡല്ഹി ക്യാപിറ്റല്സ് കഴിഞ്ഞ മത്സരത്തില് തെളിയിച്ചത്.
ദക്ഷിണാഫ്രിക്കന് പേസര് ആന്റി നോര്ച്ചെയാണ് രാജസ്ഥാന് നിരയെ, എന്തിന് ആര്ച്ചറെ പോലും ഞെട്ടിച്ച പ്രകടനം പുറത്തെടുത്തത്. മത്സരത്തിന് മുന്പ് രാജസ്ഥാന് ഡല്ഹിയെ വെല്ലുവിളിച്ച് ഒരു ട്വീറ്റ് ചെയ്തിരുന്നു. ആര്ച്ചറേക്കാള് വേഗതയുള്ള ഒരു ബൗളറെ വെച്ച് മറുപടി തരാന് കഴിയണമെന്നായിരുന്നു രാജസ്ഥാന്റെ ട്വീറ്റ്. എന്നാല്, ഡല്ഹിക്കു വേണ്ടി വെല്ലുവിളി ഏറ്റെടുത്ത് നോര്ച്ചെ എത്തി.
‘ആന്റിച്ച് നോര്ച്ചെയെ മുന്നിര്ത്തി മറുപടി നല്കാനുള്ള നടപടിക്രമങ്ങള് എന്തൊക്കെയാണ്?’. മത്സരം വിജയിച്ച ശേഷം ഡല്ഹി നല്കിയ മറുപടി ഇങ്ങനെയായിരുന്നു. നോര്ച്ചെയുടെ വേഗമേറിയ പന്തുകള് ചൂണ്ടിക്കാട്ടിയായിരുന്നു ഡല്ഹിയുടെ മറുപടി. 2020 സീസണില് വേഗമേറിയ ആദ്യ അഞ്ച് പന്തുകള് നോക്കിയാല് അഞ്ചും നോര്ച്ചെയുടെ പേരിലാണ്. 156.22 കിലോ മീറ്റര് വേഗതയിലാണ് നോര്ച്ചെ പന്തെറിഞ്ഞിരിക്കുന്നത്.
പട്ടികയില് ആറാം സ്ഥാനത്താണ് ആര്ച്ചര്. 153.62 കിലോ മീറ്ററാണ് ആര്ച്ചറിന്റെ പരമാവധി വേഗം. ഈ സീസണിലെ ആദ്യത്തെ 100 വേഗമേറിയ ബൗളര്മാരുടെ പട്ടികയില് ബഹുഭൂരിപക്ഷവും ഇവര് രണ്ടുപേരുമാണ് കൈയ്യടക്കി വെച്ചിരിക്കുന്നത് എന്നതാണ് മറ്റൊരു വസ്തുത. ഇന്ത്യയില് നിന്ന് നവ്ദീപ് സൈനിയും ജസ്പ്രീത് ബൂമ്രയും പ്രസിദ്ധ് കൃഷ്ണയും വേഗക്കാരുടെ പട്ടികയിലുണ്ട്.
Comments