ചായ ഒരു വികാരമാണ് പലർക്കും. ഭക്ഷണം കഴിക്കാൻ മറന്നാലും ദിവസത്തിൽ പല സമയങ്ങളിലായി ശീലമാക്കിയ ചായ ലഭിച്ചില്ലെങ്കിൽ അസ്വസ്ഥരാകുന്നവർ പോലും നമുക്കിടയിലുണ്ട്. ദിവസവും ഒരേ പോലെയുള്ള ചായ കുടിച്ചാൽ മതിയോ ? പാലും പഞ്ചസാരയും ചായിലയും വെള്ളവും ചേർത്ത് ചൂടാക്കി ലഭിക്കുന്ന പാനീയം എന്നതിലുപരി ചായ ഉണ്ടാക്കുമ്പോൾ ശ്രദ്ധിക്കേണ്ട ചില കാര്യങ്ങൾ കൂടിയുണ്ട്.
ഇഞ്ചി, ഏലം എന്നിവ ചായയിൽ ചേർക്കുന്നത് പ്രത്യേക രുചിയും മണവും ഉണ്ടാകാൻ കാരണമാകുന്നു. കൂടാതെ ആരോഗ്യപരമായ പല നേട്ടങ്ങളും ഉണ്ടാകുന്നു. ചായയിൽ കറുകപ്പട്ടയുടെ കഷ്ണങ്ങൾ ഇടുന്നതും നല്ലതാണ്.
ചായ ഉണ്ടാക്കുമ്പോൾ ടീ ബാഗുകൾ ഉപയോഗിക്കുന്നതിന് പകരം ചായില ഉപയോഗിക്കുന്നത് നല്ലതാണ്.
ചായ ഉണ്ടാക്കാനായി ഉപയോഗിക്കുന്ന വെള്ളത്തിന്റെ ചൂട് പോലും ചായയുടെ രുചിയെ ബാധിക്കുന്നു. കട്ടൻ ചായ, ഗ്രീൻ ടീ, പാൽ ചായ എന്നിവയ്ക്കെല്ലാം പലതരത്തിലുള്ള താപനിലയാണ് ആവശ്യമായത്. ഗ്രീൻ ടീ ഉണ്ടാക്കുവാൻ മൂന്ന് മുതൽ നാല് മിനിറ്റ് വരെയും കട്ടൻ ചായ ഉണ്ടാക്കുവാൻ നാല് മുതൽ അഞ്ച് മിനിറ്റ് വരെയും വെള്ളം തിളപ്പിക്കേണ്ടതുണ്ട്.
വെറുമൊരു പാനീയം എന്നതിലുപരി ധാരാളം ആരോഗ്യവശങ്ങൾ ഉള്ളതാണ് ചായ. എന്നാൽ ചായയിൽ പാൽ ഒഴിക്കുമ്പോൾ ഈ ഗുണങ്ങൾ ഇല്ലാതെയാകുന്നു എന്ന് അടുത്തിടെ പുറത്തിറങ്ങിയ യൂറോപ്യൻ ഹാർട്ട് ജേർണലിൽ വിവരിച്ചിരുന്നു.
ചായില അല്ലെങ്കിൽ ചായപ്പൊടി സൂക്ഷിച്ചിരിക്കുന്ന പാത്രം നന്നായി അടച്ചുവെക്കുവാൻ ശ്രദ്ധിക്കുക. ജലാംശമോ വായുവോ പാത്രത്തിൽ കയറിയാൽ പെട്ടെന്ന് തന്നെ ഇവ കേടാകുന്നതാണ്.
ചായ ഉണ്ടാക്കുമ്പോൾ ആവശ്യത്തിന് പാലും മധുരവും ചായപ്പൊടിയും ചേർക്കാൻ ശ്രമിക്കുക. ആവശ്യത്തിൽ കൂടുതലായി ഇവ ചേർക്കുന്നത് രുചി വർദ്ധിപ്പിക്കുന്നില്ല എന്ന് മനസിലാക്കുക.
